DÍLI, STLTIMORLESTE.com — Preparasaun Festival Nasionál Desportu (FND) 2026 la’o di’ak, ho partisipasaun federasaun desportiva 11 no kooperasaun autoridade munisipál sira.
Prezidente Konfederasaun Desportu Timor-Leste, Afrânio Xavier Amaral hato’o informasaun ne’e ba jornalista sira iha semináriu ne’ebé hala’o iha ETDA, Dili, Tersa-feira (27/10/2026).
Afrânio afirma katak, preparasaun festival ne’e kontinua la’o di’ak, liuliu kooperasaun ho autoridade munisipál sira atu garante organizasaun kompetisaun iha nivel nasionál.
“Preparasaun sira la’o di’ak, inklui kooperasaun ho autoridade munisipál sira. Ami sei hala’o sorumutu atu koordena preparasaun festival ne’e,” Afrânio hateten.
Nia esplika katak, ho tempu preparasaun hela loron 14, organizadór sira hein lista delegasaun no partisipante sira atu bele finaliza programa kompetisaun.
Informasaun ne’e sei encaminha ba federasaun desportiva 11 ne’ebé partisipa, hodi prepara oráriu, kampu no nesesidade téknika ba kompetisaun.
Iha parte infraestrutura, Afrânio informa katak Autoridade Munisipál Dili, nu’udar lider komisaun organizadora, hamutuk ho Ministériu Juventude, Desportu, Arte no Kultura, halo ona observasaun ba fatin kompetisaun.
Observasaun ne’e abranje kampu no infraestrutura desportiva iha Dili, atu asegura kondisaun adekuada ba realizasaun festival.
Nia hateten katak, delegasaun husi munisípiu sira sei hahú to’o iha Dili hosi 10 Novembru 2026, hodi prepara partisipasaun iha festival.
“Preparasaun infraestrutura importante atu garante delegasaun husi munisípiu sira simu atendimentu no fasilidade apropriada bainhira to’o iha Dili,” nia esplika.
Afrânio hatutan katak festival ne’e sei inklui modalidade 11, ho modalidade 10 ba kompetisaun desportiva no modalidade ida ba atividade tradisionál kona-ba hahán.
Festival Nasionál Desportu 2026 sei sai plataforma atu promove dezenvolvimentu desportu, hametin unidade entre munisípiu sira no fó oportunidade ba atleta sira hatudu kapasidade iha nivel nasionál.
(leo)
