DILI, STLTIMORLESTE.com – Estudantes husi Eskola Sekundáriu Jerál FINANTIL partisipa regularmente iha atividades desportivas, maibé eskola refere sei presiza apoiu hodi hadi’a no aumenta fasilidade desportiva ba estudantes sira.
Diretor Eskola Sekundáriu Jerál FINANTIL, Aniceto Berlelo hato’o informasaun ne’e ba STL iha nia knaar fatin Aimutin, Kinta (03/09/2026).
Nia dehan, atividades desportivas iha eskola lao nafatin, no bainhira hetan konvite ba estudantes atu partisipa iha kompetisaun ka atividade desportiva ruma, estudantes sira bele partisipa tanba sira hetan ona preparasaun no teoria husi profesor sira.
“Hau hanoin kona-ba atividades desportivas ne’e, ita-nia estudantes sira partisipa duni iha atividades ida ne’e, maibé presiza hadi’a fasilidade sira ba ita-nia estudantes sira. Tanba iha FINANTIL, atividades desportivas lao hela. Bainhira hetan konvite ruma ba ita-nia estudantes sira, sira bele partisipa, tanba sira simu ona teoria husi ita-nia professor sira,” dehan Aniceto Berlelo.
Nia hatete, atividades desportivas lao hanesan bai-bain, maibé fasilidade desportiva sei menus, liuliu tanba eskola seidauk iha kampu apropriadu atu hala’o atividades desportivas.
Aniceto dehan, eskola hakarak hadi’a kampu desportiva no halo kampu multifunsaun. Eskola mos hatama ona pedidu ka proposta ba Ministeriu Juventude no Desportu, maske asuntu fasilidade desportiva la’ós diretamente iha responsabilidade ministeriu refere, tanba eskola konsidera asuntu ne’e iha ligasaun ho desportu.
“Nee duni ita tenke hadi’a fasilidade sira ne’e. Ezemplu, iha Finantil ita hakarak halo kampu multifunsaun, maibé kampu ne’e ninia kondisaun ita presiza hadi’a duni. Ami mos seidauk iha ekipamentu desportivu ne’ebé sufisiente ba ita-nia estudantes sira,” katak nia.
Iha fatin seluk, Gabineti Apoiu Tékniku (GAT) EBC Manleuana, Narcisio P. S. V. da Costa, hatete katak estudantes husi Ensinu Baziku Sentral (EBC) Manleuana hala’o atividades desportivas iha sira-nia eskola.
Nia hatete, atividades desportivas refere hahú husi Segunda-feira no sei remata iha Sabadu. Jogu sira ne’ebé estudantes hala’o inklui basketball, futsal no volleyball.
“Agora dadaun ami-nia estudantes sira halo atividades desportivas iha ami-nia eskola. Atividades refere hahú husi Segunda-feira no remata iha Sabadu. Jogu ne’ebé ami-nia estudantes sira hala’o mak hanesan basketball, futsal no volleyball, tanba ita-nia estudantes ida-idak iha talentu ba desportu ne’ebé sira gosta,” dehan Narcisio.
GAT EBC Manleuana dehan, durante semana ida, estudantes sira kontinua hala’o jogu sira iha eskola. Atividades ne’e envolve estudantes feto no mane, maibé estudantes husi EBC sentral de’it, enkuantu eskola filial sira hala’o atividades desportivas iha sira-nia eskola rasik.
Nia subliña katak atividades desportivas la’ós ba estudantes mane de’it, maibé estudantes feto mos partisipa no hatudu sira-nia talentu.
(jac)
