DILI, STLTIMORLESTE.com – Atu evita para komunidade sira labele konsumu aimoruk neebe liu prazu hodi afeita bá ema nia saude no vida, presiza governu no instituisaun kompetensia halo kontrolu bá kios kiik sira neebe faan aimoruk rahun, liu-liu iha area rural sira.
Tuir Komunidade no Konsumedor Clarinha de Deus dehan, instituisaun no governu neebe kompetensia presiza halo kontrolu no sosializasaun bá kios kiik sira neebe faan aimoruk rahun iha rai laran, liu-liu iha area rural sira. Tanba sira sosa husi Dili lori ba faan iha foho, maibe la hatene tuir data prazu. Entaun bainhira ema ruma konsumu bele afeita fali bá sira nia saude no vida.
“Ami sira hela iha foho nee, bainhira senti isin manas ka ulun moras ona naran bá sosa deit aimoruk sira neebe ema faan iha kios neebe ami hela besik bá. Atu lao bá ospital tanba dok, entaun sosa deit iha kios. Ami nia preokupasaun mak aimoruk neebe faan nee, sei bele hemu ka lae, tanba kios nain sira iha area rurais nee mos sosa fali iha apotik sira iha Dili mak lori mai faan iha nee. Tanba kios nain sira dala ruma faan aimoruk sira nee ho tempu naruk, neebe sira mos la hatene tuir aimoruk nia data prazu,” dehan nia bá STL iha Fatuhada, Tersa (05/05/2026).
Nia hatutan, husu bá parte saude iha Postu nian atu halo sosializasaun bá komunidade sira, liu liu bá sira neebe faan aimoruk bainhira bá sosa iha apotik sira iha Dili atu husu tuir data prazu nian, nunee too loron prazu sira tenke ho honestu soe ka sunu tiha aimoruk sira nee, selae sira kontinua faan deit maske liu ona prazu. Atu nunee labele afeita fali bá ema nia saude no vida.
Nunee mos Jasinto Babo dehan, iha munísipiu sira liu-liu iha area rurais, komunidade sira neebe hela dok husi sentru no postu saude, bainhira senti moras iha isin lolon ruma hakarak ka lakohi sira tenke sosa duni aimoruk iha kios neebe besik ho sira. Iha momentu hanesan neemak aimoruk nee liu prazu ona entaun bele hamosu fali moras seluk hodi afeita bá vida komunidade sira nian.
Tuir nia, ema neebe faan aimoruk tenke halo tuir regulamentu no tuir lei, atu nunee labele faan aimoruk iha kios kiik sira.
Nunee mos Parteira Petronela dos Santos katak, husi parte saude nian dadaun nee halo hela inspesaun ba Farmásia, klinika nomos kios sira neebe faan aimoruk iha Dili laran. Atividade nee atu asegura katak atividade faan aimoruk tenke tuir decreto lei neebe vigor.
(dom)
