DILI, STLTIMORLESTE.com – Diretor Luta Hamutuk, Jose Alves da Costa hatete, Governu presiza rezolve linha Fronteira ho Indenezia, nunee bele halo kontrola ba tasi sira, tanba oras nee daudaun peska ilegal mos barak.
“Buat sira nee importante, tanba nasaun ida presiza iha nia fronteira, tanba nee tenke ho kalma labele ho pensamentu ida katak hakarak manan mesak ka diak liu lakon, tanba nee se dehan iha ona konkordansia hau hanoin nee importante tebes, tanba agora peska ilegal barak, no ita mos laiha ekipamentus adekuadu iha F-FDTL no PNTL hodi halo kontrolu, tanba nee presiza define fronteira ida nee,” dehan Jose Alves ba STL liu husi telefone, Sesta (10/01/2025).
Nia haktuir, nasaun presiza iha Fronteira rasik nunee bele halo kontrola ba teritoriu tasi sira, para bele prevene peska ilegal iha tasi.
“Ita husu Indonezia no Australia para fo apoiu ba ita, atu nunee bele halo kontrola ba peska ilegal sira iha territoriu tasi nia, tanba nee mak importante tebes atu deside fronteira rasik,” katak nia.
Nunee mos Feto Potensial, Maria Amaral hatutan, deklarasaun husi Primeiru Ministru neebe mak deklara katak, Indonezia konkorda ona halo negosiasaun ba Fronteira Terrestre, ida nee importante no mensajen neebe mak diak.
“Deklarasaun husi Primeiru Ministru neebe media sira fo sai ba publiku katak, Indonezia konkorda ona atu halo negosiasaun ba Fronteira, ida nee mensajen neebe mak diak, oinsa mak hamutuk hodi bele buka rezolve problema fronteira, nunee idak-idak bele halo kontrola ba peska ilegal iha tasi,” katak nia.
Entretantu Primeiru Ministru, Kay Rala Xanana Gusmão hatete, oras nee daudaun Governu Indonezia aseita ona atu halo negosiasaun ba Fronteira Maritima, nunee bele halo kontrola ba peska ilegal sira neebe lao hela iha tasi mane.
(eme)
