DILI, STLTIMORLESTE.com – Prizaun Suai oras nee daudaun iha dadur hamutuk nain 120, kompostu husi sira neebe hetan ona kondenasaun ikus husi Tribunal no Prizaun Preventiva.
“Prizaun Suai iha dadur 120, sira neebe sentensiadu iha 97 no sira neebe preventiva iha 23,” dehan Diretor Interenu Prizaun Suai, Agusto Humberto Dos Reis ba STL liu husi telefone, Segunda (16/12/2024).
Nia dehan, kona-ba kondenadu ida CJS neebe hetan indultu foin lalais nee, kondenadu nee sai kedan husi Prizaun iha momentu dekreitu lei publika, no Ministeriu Justisa envia ba iha Prizaun Suai kanaliza kedan ba iha Tribunal no fo liberdada tuir mandadu neebe iha.
Momentu neeba halo koordenasaun ho Ministeriu Solidariedade Sosial Munisipal no Ministeriu Solidarieade Nasional, halo reintegra fila fali liu husi servisu ekipa tekniku liu husi MSS mak lori ba reintegra ba nia familia iha Atabae.
Iha fatin ketak, Jurista Jose Maria Guterres dehan, regra atu hetan indultu nee iha, bazeia ba lei neebe iha.
“Dadur ida atu heten indultu bazeia ba lei nebee iha, liu husi sira nia defeza bele hatama karta kuandu sira hakarak, ikus mai Prezidente mak desidi,” dehan nia.
(ter)
