DILI, STLTIMORLESTE.com – Prezidente Republika (PR) Jose Ramos Horta hatete, oras nee dadaun problema barak iha setor justisa, tanba nee Prezidente hein instalasaun Tribunal Supremu Justisa (TSJ).
Prezidente Republika Jose Ramos Horta ba Jornalista iha Farol, Dili, Tersa lokraik (21/04/2026) hatete, tuir nia haree mosu problema barak iha setor justisa, tanba nee ho instalasaun TSJ sei bele haree ba assuntu sira nee.
“Iha problema barak los iha setor justisa premeiru hau hein prosesu instalasaun tribunal supremu nee lao dadaun komisaun neebe Dr Avelino Coelho mak kaer serbisu hamutuk ho Prezidente Parlamentu maibe tuir Prezidente parlamentu nia knaar, knaar boot liu mak komisaun nee ke Dr Avelino mak kaer, Prezidente laiha mandatu direitu ba nee,” dehan Prezidente Republika.
Xefe Estadu hatete bainhira prontu halo instalasaun Tribunal Supremu Justisa hotu iha outubru ka novembru Prezidente Republika mak nomeia Prezidente Supremu Tribunal, maibe naran sira nee mai husi juis sira.
“Hau akompanha bebeik Dr Avelino Coelho, Prezidente Parlamentu mos ami koalia konaba ida nee, hau haree tok sebele hadia justisa nee diak,” katak PR Horta.
Xefe Estadu hatete nia lakohi kritika laos deit tribunal mak dalaruma serbisu ladun diak karik, estadu rai barak akontese buat balun lao diak balun lao ladun diak nee vida nasaun no estadu nunee.
Prezidente Republika hatete tuir nia haree nasaun sira iha mundu nee buat hotu laos lao perfeitu hotu buat balun lao lalos mos, maibe balun perfeitu hanesan Singapura, Norwegia, Suisa, no Timor Leste mos neneik sei bele hanesan mos ho nasaun sira nee.
Iha fulan kotuk Prezidente Ramos-Horta hasoru malu ho membru husi Komisaun Rekrutamentu no Selesaun, neebe lidera husi Avelino Coelho no Carmelita Moniz, atu diskute kona-ba instalasaun Supremu Tribunal Justisa no Tribunal Rekursu nian neebe lao hela.
Delegasaun nee hatoo informasaun kompletu kona-ba rezultadu servisu durante loron tolu nulu (30) dahuluk, hodi konfirma katak dokumentu administrativu hotu neebe presiza, regulamentu internu, no manual avaliasaun nian finaliza ona atu kontinua prosesu nee ba oin.
Durante audiensia nee, Prezidente hatoo nia perspetiva kona-ba kalendariu ba nomeasaun sira-nee, neebe Komisaun iha objetivu atu instala Supremu Tribunal iha tinan ida-nee nia laran, karik bele akontese hamutuk ho data nasional importante sira iha Agostu ka Setembru. Maski Prezidente fo orientasaun kona-ba tempu nian, nia foka katak inaugurasaun final depende ba finalizasaun rekrutamentu no prosesu selesaun neebe rigorozu no susesu.*
(eme)
