BAUKAU, STLTIMORLESTE.com – Relasiona problema kondisaun estrada iha merkadu foun Tuanau, parte Jestaun Merkadu hatoo ona ba Diresaun Servisu Ministeriu Obras Publiku (MOP) Munisipal fo solusaun.
Diretor Jestaun Merkadu Munisipiu Baukau, Geronimo da Conceição rekonhese, kondisaun estrada iha merkadu refere fo impaktu ba negosiante sira nia sasan, tanba kondisaun rai mutin neebe ateru ba estrada iha merkadu refere suar makaas, bainhira volume movimentu transporte ba merkadu refere iha.
Mezmu kondisaun nunee, hafoin muda negosiante sira husi merkadu tuan ba merkadu refere, neebe hahu ona negosiu iha loron hirak liu ba, parte jestaun merkadu kordena kedas ho parte patrimoniu lojistiku neebe apoiu karreta Bombeiru kada loron halo atusaun ba rai rahun iha merkadu refere, maibe kontinua la sufisiente, tanba karreta bombeiru ida deit.
“Ami iha dever fo ona informasaun ba Obras Publiku para sira haree estrada tama no sai, presiza duni dala nee halo reabilitasaun hodi rai rahun labele suar,” hatete Geronimo ba STL, iha knaar fatin Vila Nova, Baukau, Segunda (02/12/2024).
Hatan ba kestaun nee, Diretor Servisu Obras Publiku Munisipiu Baukau, Agostinho Ximenes akresenta, estrada liga ba merkadu refere inklui ona iha projetu manutensaun estrada urbana iha Postu Baukau vila husi vila antiga too vila nova neebe responsabiliza husi kompanha lokal roman Grigio Unip.Lda, ho alokasaun orsamentu hamutuk rihun US$ 600.00 neebe dadaun hahu ona servisu iha terenu.
Estrada ba merkadu foun refere neebe parte Obras Publiku orienta kompanhia implementador atu cor ho sumenti hamutuk metru 670, maibe too ohin loron parte kompanhia seidauk marka prezensa iha merkadu refere.
Enkuantu estrada urbana iha sidade Baukau husi vila antiga too Vila Nova neebe parte kompanhia atu halo manutensaun, hahu ona fulan hirak ba kotuk, tuir planu remata iha fulan Dezembru tinan nee, hamutuk ho estrada iha merkadu foun, maibe konsidera projetu manutensaun laiha mudansa.
(EST 2)
