BAUKAU, STLTIMORLESTE.com – Profesores bolsa kandidatu faze primeiru neebe Ministeriu Edukasaun (ME) koloka ba Eskola Ensinu Baziku Filial Makalaku, husu Governu konstrui uma hela fatin ba sira hodi hela.
Lia hirak nee hatoo husi Profesor Kolokadu, Abilio Vital Gaio de Carvalho ba jornalista sira iha Suku Makalaku, Postu Administrativu Kelikai, Munisipiu Baukau, Kinta (05/12/2024).
“Ami kontente tebes tanba bele ezerse ami nia funsaun nuudar manorin iha eskola ida nee, problema neebe ami hasoru mak kona-ba hela fatin, fulan 7 ona ami iha eskola nee, maibe hela ho komunidade,” nia dehan.
Profesores bolsa kandidatu neebe koloka ba eskola refere hamutuk nain 3, kompostu feto 2, nain ida husi Munisipiu Likisa no ida seluk husi Aileu neebe obrigatoriu tenke hela ho komunidade sira iha Suku refere, enkuantu nain ida seluk nuudar Baukau Oan neebe hela iha Baukau Vila hafoin ba hanorin estudante sira, tanba laiha hela fatin.
Nia fundamenta, koalia kona-ba hadia kualidade edukasaun iha Timor Leste, maibe laiha kondisaun hanesan uma hela fatin ba profesor kolokadu sira hodi hela iha fatin seluk hanorin iha fatin seluk, nee fo impaktu ba estudante, tanba estudante sira simu materia la kompletu iha oras prosesu aprendizajen, tanba profesor materia too tarde neebe kauza husi hela fatin dook husi eskola.
(EST 2)
