DÍLI, STLTIMORLESTE.com – Estudante sira husi Eskola Sekundária Tékniku Vokasionál (ESTV) 28 de Novembro, Becora-Díli, la sei hala’o ezame III períodu hanesan estudante sira husi Eskola Sekundária Jerál (ESJ), maibé sei tuir ezame bazeia ba módulu (modular) ne’ebé prepara no fó husi profesór ida-idak.
Diretór ESTV 28 de Novembro, Becora-Díli, Tomás Pinto, hateten ba STL, Segunda-feira (16/11/2026), katak sistema avaliasaun iha eskola tékniku vokasionál diferente ho sistema ezame ne’ebé aplika iha eskola sekundária jerál.
“Eskola ESTV 28 de Novembro nia ezame modular la hanesan ho ezame baibain iha ESG sira. Tanba ne’e, ami-nia estudante sira tuir de’it ezame modular ne’ebé profesór ida-idak prepara, bazeia ba matéria no módulu ne’ebé sira aprende ona,” nia esplika.
Nia aumenta katak, prosesu avaliasaun ne’e importante atu prepara estudante sira, liuliu estudante klase 11, antes sira hahú estájiu iha tinan oin ka iha inísiu tinan 2027.
Iha parte seluk, Diretór Eskola Hotelaria no Turizmu Becora, Charles Fatima Guterres, mós konfirma katak estudante sira iha eskola ne’e la tuir ezame hanesan estudante sira husi ESG, maibé tuir de’it ezame modular.
“Ami-nia estudante sira la hala’o ezame hanesan estudante sira husi eskola sekundária jerál, tanba ami-nia estudante sira sei tuir de’it ezame modular,” nia dehan.
Enkuantu ne’e, Diretór Eskola Básika Central (EBC) Manleuana, Carlos Correia, afirma katak eskola prepara ona atu hala’o ezame III períodu, ne’ebé sei realiza iha loron 23 fulan Novembru 2026.
Nia husu estudante sira atu prepara an ho di’ak hodi bele partisipa no hala’o ezame ho susesu.
“Hau hanoin katak estudante sira bele prepara an ho di’ak atu tuir ezame III períodu ne’e,” nia informa.
(jac)






