DILI, STLTIMORLESTE.com – Profesores neebe mak daudaun nee hanorin iha Eskola Hotelaria no Turizmu Bekora hanorin tuir idak-idak nia background.
“Atualmente profesor no profesora neebe daudaun nee hanorin iha ami nia eskola refere hanorin tuir idak-idak nia background neebe mak iha ona, tanba ami nian total profesores hamutuk 30, husi numeru ida nee sira hanorin tuir idak-idak nia area neebe ohin mensiona, sala de aula hamutuk 9 no sala pratika 3,” dehan Diretor Eskola Hotelaria no Turizmu Bekora, Charles F. Guterres ba STL iha nia knaar fatin, Kuarta nee (15/04/2026).
Nia dehan, profesores iha eskola ida nee hanorin estudantes sira tuir duni idak-idak nian area neebe mak iha, tanba nee sira hanorin tuir orariu neebe mak iha ona, oinsa mos sira bele halo planu de aula.
Iha fatin seluk, Diretor Nasional Ensinu Sekundariu no Tekniku Vokasional, Fernando Mouzinho Gama antes nee dehan, ensinu tekvo balun sei menus profesores ba area produtivu, maibe ho rekrutamentu daudaun nee ba ensinu tekvo bele resposta ba eskola balun neebe sei menus profesores.
“Ita nian ensinu tekvo balun sei menus profesores ba area produtivu, maibe ho rekrutamentu daudaun nee ba ensinu tekvo bele resposta ba eskola balun neebe sei menus profesores, tanba nee ba oin presiza aumenta profesores ba tekvo balun menus profesores, ita nian professores neebe mak hanorin iha tekvo nee,sira nee hanorin tuir sira nian area duni,tanba iha tekvo nee hanorin tuir duni Sira nian background neebe mak iha,” dehan nia.
Nunee mos Diretor Eskola Sekundáriu Téknika Vokasional ba Indústria no Teknólojia (ESTV-IT) 28 de Novembru Bekora, Tomas Pinto hatete, profesores ba area produtu iha Eskola Sekundáriu Téknika Vokasional ba Indústria no Teknólojia (ESTV-IT) 28 Novembru Bekora sei menus,no hirak neebe iha nee,hanorin tuir sira nian area duni.
“Profesores ba produtivu mak menus ou area espesifiku mak menus, mais area sientifiku ho sosio kultura barak liu ona. Dala ruma sei muda profesores sientifiku no sosio kultura balun ba fatin neebe presiza ou eskola seluk neebe presiza,” nia esplika.
(jac)
