DILI, STLTIMORLESTE.com – Profesores no estudantes sira iha Eskola Ensinu Baziku Central (EBC) Manleuana asegura ho diak livru sira ne’ebé rai iha biblioteka, atu estudantes sira bele asesu no uza livru hirak-ne’e ba prosesu aprendizajen.
Gabinete Apoiu Tekniku (GAT) EBC Manleuana, Narciso Pinto Soares Vieira da Costa, hatete ba STL, Kinta-feira (15/10/2026), katak professores no estudantes sira uza livru tuir nesesidade no depois rai fali iha biblioteka, atu bele uza hamutuk.
“Ami-nia professores no estudantes sira, durante ne’e, asegura ho diak livru sira. Bainhira sira lori livru ba aprende iha sala laran, depois uza hotu, sira rai fali iha biblioteka. Nune’e, estudantes sira seluk bele asesu nafatin ba livru sira ne’ebé iha biblioteka,” nia esplika.
Narciso hatutan katak, to’o agora livru sira iha biblioteka EBC Manleuana sei sufisiente. Bainhira professores ba disiplina ida-idak presiza livru atu uza iha prosesu hanorin, sira bele foti iha biblioteka no, depois uza, rai fali iha fatin orijinál.
Iha parte seluk, Diretór EBC Manleuana, Carlos Correia, hatete katak eskola asegura livru sira iha biblioteka no fó empresta ba estudantes atu lori ba uma, hodi estuda no depois entrega fali ba eskola.
“Ami-nia biblioteka iha livru sira, no ami asegura ho diak iha biblioteka. Estudantes sira bele foti livru, hakerek sira-nia naran no lori ba uma. Depois, sira lori mai entrega fali iha eskola. Prazu empresta mak semana ida. Se lae, estudantes sira bele uza livru sira atu estuda iha sala laran de’it,” nia dehan.
Carlos hatutan katak, estudantes sira ne’ebé empresta livru atu lori ba uma iha prazu semana ida atu entrega fali. Eskola kontinua asegura livru ba disiplina hotu-hotu, atu estudantes sira bele uza no asesu ba rekursu aprendizajen ne’ebé disponivel iha biblioteka.
Enkuantu ne’e, funsionáriu biblioteka iha Eskola Sekundária Jerál Finantil, Adilson Viegas Esperito Santos, hatete katak estudantes sira bele empresta livru ida durante loron tolu, no tenke entrega fali ba eskola bainhira prazu remata.
Maski nune’e, nia haktuir katak espasu biblioteka ne’e seidauk sufisiente atu atende nesesidade estudantes sira, tanba kada loron biblioteka atende estudantes hamutuk 30.
Nia husu atu iha apoiu husi entidade edukasaun relevante, atu bele hadi’a no aumenta espasu biblioteka, hodi estudantes sira hetan fatin ne’ebé sufisiente no konfortável atu lee no estuda.
(jac)
