DILI, STLTIMORLESTE.com – Profesores husi Eskola Sekundariu Jeral 10 Dezembru Comoro hahu prepara ona pontus ezame primeiru periodu ba estudantes sira.
“Ami nian pontus ezame ba estudantes sira ami prepara tiha ona, nee ami nian profesores kada disiplina idak-idak prepara ona, hein deit ezekuta iha programa ezame ninia, rihun ida atus neen haat nolu resin haat nee mak sei partisipa iha ezame primeiru periodu ba tinan ida nee, maibe sala neebe mak estudantes sira atu uza ba iha ezame nee seidauk sufisiente, sala hamutuk 34, nee seidauk sufisiente,” dehan Diretor Eskola Sekundariu Jeral 10 Dezembru Komoro, Manuel Verdial ba jornalista STL iha Komoro, Tersa nee (31/03/2026).
Verdial dehan, sala 34 nee seidauk sufisiente, tanba tuir lo-loos kada sala nee estudantes tenke 40 mai kraik, labele liu ida nee, agora ezame nee sira simu ona informasaun husi edukasaun katak, tanba loron 6 fulan Abril pontu toleransia, nunee ezame nee halao fali iha loron Tersa 7 Fulan Abril.
“Ita nian estudantes sira mak presiza prepara estuda, tanba durante nee sira simu ona materia husi profesores sira, entaun oinsa mak sira bele prepara aan liu husi esforsu aan estuda, atu nunee bele hetan valor neebe diak husi ezame refere,” nia afirma.
Nunee mos, Deolindo do Rego nuudar estudante husi ESJ 10 Dezembru Komoro hatete, semana oin sira hahu ezame primeiru periodu, nee duni daudaun nee prepara aan estuda.
“Semana oin ami hahu ezame primeiru periodu, nunee daudaun nee ami tenke prepara aan estuda, atu nunee iha ezame buat hotu bele fasil ba ami, liu-liu ba materia neebe antes nee ami simu ona husi profesores sira, ida nee mak ami tenke estuda,” katak nia.
(jac)
