DILI, STLTIMORLESTE.com – Profesores idade reforma nain 4 ou 5 husi Ensinu Baziku Filial (EBF) nu. 5 Komoro kontinua ativu hanorin, hodi hein desizaun reforma nian husi Ministeriu Edukasaun (ME).
Haktuir Koordenador EBF nu 5 Komoro, Marcelino Moniz de Araujo ba STL, Kinta nee (20/03/2025).
“Informasaun nee ami rona deit, maibe resposta lo-loos seidauk, iha hau nian eskola nee ita nian profesores neebe tama ba idade reforma nee nain 4 ka 5, nee sira nian idade nee 75 ba leten ona, maibe ami rona fali dehan muda fali ba iha 2026, iha tinan hira liu ba antes de Covid-19 nee ita iha profesores nain rua mak konsege individualmente hatama rekerimentu ba ME, tanba sira rasik mak husu duni,” nia informa.
Nia dehan, agora profesores nain 4 ka 5 nee too ohin loron seidauk hatama karta rekerimentu ruma no sira hein deit desizaun husi ME, no profesores nain 5 nee kontinua hanorin ativu hela iha eskola, profesores nain 4 ou 5 nee hanorin materia jeral deit.
Iha fatin seluk, Olinda Silva hanesan profesora husi EBF Naroman dehan, ninia idade tama ona ba reforma ninia, maibe too agora seidauk reforma no sei ativu hanorin hela estudantes iha eskola, karta rekerimentu seidauk hatama ba ministeriu, maibe idade ona nia hein deit informasaun husi ME bainhira mak atu reforma sira.
“Hau idade tama ona ba reforma ninia, maibe too agora seidauk reforma no sei ativu hanorin hela estudantes iha eskola, karta rekerimentu seidauk hatama ba ministeriu, maibe idade ona nia hein deit informasaun husi ME, bainhira mak atu reforma sira. Ita idade ona dala ruma moras beibeik,” nia afirma.
Entretantu Diretor Servisu Edukasaun munisipiu Ainaro, Patricio da Costa Magno hatete, profesor iha Ainaro mos hamutuk 129 mak tama ona ba idade reformadu.
“Iha Ainaro profesor hamutuk 129 mak tama ba idade reformadu kompostu husi mane 79, feto 50. Husi nivel Pre-Eskolar nain 4, Ensinu Baziku 120, Ensinu Sekundariu Jeral 5,” dehan nia.
(jac)
