DILI, STLTIMORLESTE.com – Profesores S1 ho S2 mak hanorin estudantes sira iha eskola ESTV-IT 28 Novembru Becora, no laiha profesores ho nivel sekundariu.
Liafuan nee hatoo husi Diretor Eskola ESTV-IT 28 Novembru Becora-Díli, Tomas Pinto ba STL iha nia knaar fatin, Segunda nee (17/08/2026).
“Profesores hotu-hotu ho grau profesor ou grau ba salariu, liga ba kategoria grau profisional profesores hotu iha grau lisensiadu no balun mestradu mak hanorin iha ita nian eskola, laiha profesores neebe ho nivel sekundariu,” katak nia.
Tomas akresenta, laiha profesores neebe mak ho nivel sekundáriu nee laiha, tanba agora daudaun sira nian profesores S1 ho S2 mak hanorin iha sira nian eskola, tanba sira nian profesores S1 ou lisensiatura nee iha 38 no mestradu nain 10.
Iha fatin la hanesan, Diretor Nasional Ensinu Sekundariu iha ME, Benjamin Gomes da Cruz Fernandes dehan, Ministeriu Edukasaun (ME) kestiona manorin balun ho nivel bacharelatu sei kontinua hanorin estudantes sira iha nibel sekundariu jeral.
“Tuir lei baze de edukasaun hakerek iha neeba dehan katak, ema atu hanorin iha ensinu sekundariu minimu nee tenke ho lisensiatura, agora daudaun ita hotu hatene katak, iha ensinu sekundariu jeral sei iha manorin balun sei ho nivel bacharelatu, maibe ministeriu sei haree no tetu didiak, haree ba nesesidade hanorin iha eskola hotu, haree ba buat sira nee hotu foin bele halo kolokasaun entre manorin sira nee ba fali iha ensinu baziku,” nia komenta.
Nia dehan, buat hirak nee liu husi prosesu ida, tanba bainhira muda fali sira ba iha ensinu baziku tuir lei, ME sei haree hikas fali se mak atu subtitui fali iha sira nian fatin, tanba ida nee balun too agora halao ona, balun seidauk, nunee ME sei haree ba iha nesesidade husi eskola idak-idak nian neebe mak iha teritoriu laran. Profesor seidauk sufisiente liu-liu ba area produtivu nian.
Nunee mos Diretor Eskola Sekundariu Nobel da Paz, Jeremias P. de Jesus dehan, profesores neebe hanorin nee maioria ho nivel lisensiatura mak hanorin iha sira nian eskola, no kada loron sira sempre kumpri ba iha regulamentu neebe mak iha ona.
“Hau hanoin profesores neebe hanorin nee maioria ho nivel lisensiatura mak hanorin iha sira nian eskola no kada loron sira sempre kumpri ba iha regulamentu neebe mak iha ona,” nia esplika.
Jeremias dehan, profesores sira neebe mak hanorin iha nee aprezenta sira nian planu kada loron molok sira atu hanorin estudantes sira iha sala, tanba profesor ida atu hanorin estudantes sira nee tenke halo planu ruma.
“Ita nian pofesores sira neebe mak hanorin iha nee aprezenta sira nian planu kada loron molok sira atu hanorin estudantes sira iha sala, tanba profesor ida atu hanorin estudantes sira nee tenke halo planu ruma,” nia deklara.
Nia hatete, iha nee profesores sufisiente hela, karik iha profesores neebe mak moras no husu lisensa iha asuntu importante ruma, nee sira hatoo uluk informasaun ruma ba iha parte eskola hodi bele hatene.
(jac)
