DILI, STLTIMORLESTE.com – Ensinu Baziku Filial (EBF) Marinir husu ba profesores hanorin estudantes sira tenke hatene sira nian karakter.
Lia hirak nee hatoo husi Kordenador Ensinu Baziku Filial (EBF) Marinir, Aureliano Maia ba jornalista STL iha nia knaar fatin, Sesta nee (14/08/2026).
“Hau hanoin ita labele halo violensia ba ita nian estudante sira, tanba ita nian profesor sira nee uza metodu barak, iu-liu ita nian profesores sira uza metodu oinsa mak bele hatene karakter estudantes sira, nee duni ita nian profesor sira mak presiza hatene estudantes ida-idak nian karakter,” nia esplika.
Nia dehan, oinsa mak profesor sira halo aprosimasaun hodi bele hatene lo-loos karakter estudantes ida-idak nian, tanba sira mai ho karakter neebe la hanesan, oinsa profesor sira presiza hanorin estudantes ho pasiensia.
“Ita nian manorin sira mak loro-loron halao aprendizajen, entaun bele hatene estudante sira nia karakter nee oinsa, tanba estudantes husi EBF nee mesak labarik deit, hanorin estudantes sira ho pasiensia,” katak nia.
Parte seluk, Koordenador EBF Fatumeta, Jose Manuel Guterres dehan, Ensinu Baziku Filial (EBF) Fatumeta sempre fo hanoin ba manorin sira, bainhira hanorin estudantes sira tenke pasiensia ho fuan boot, tanba labarik sira mai ho karakter neebe mak la hanesan.
“Difikuldade seluk neebe mak ami enfrenta mak ita nian estudantes sira nakar nee, tanba agora ema bandu labele baku, nee hanesan dezafiu boot ida, nee mak ita nian profesores sira durante nee enfrenta, liu-liu ita nian profesores neebe mak hanorin iha sala laran. Atu solusiona problema nee mak primeiru ita nian profesores neebe mak hanorin estudantes sira nee tenke ho fuan neebe mak boot, hakarak ka lakohi ida nee tenke adapta,” afirma nia.
Tanba tuir Jose, nuudar direjente ida husi eskola nee, nafatin husu ba profesores sira tenke pasiensia no fuan boot, tanba kada estudantes ida-idak mai ho karakter neebe mak la hanesan, balun la nakar no balun mak nakar, nunee sai manorin nee tenke fuan boot atu hasoru dezafiu hotu hodi buka solusaun ba problema hirak nee.
“Sekuandu la pasiensia, nee labele, tanba estudantes sira iha EBF nee mai ho idade neebe mak kiik, sira nian hanoin mak mai nakar no halo tun sae deit, nee labele, tanba nee presiza pasiensia no fo hanoin ba estudantes sira labele nakar, mai eskola para atu aprende, maibe labarik kiik hotu deit, ita mak pasiensia,” nia informa.
(jac)
