DILI, STLTIMORLESTE.com – Formasaun Programa Eskolar Pre-Referensia Google (EPRG) ajuda profesor sira atu integra teknolojia iha sala-de-aula sira no serve diak liu tan estudante sira.
Tuir informasaun neebe asesu husi pajina Ministeriu Edukasaun (ME), Kinta nee (23/04/2026) hatete, ME anunsia kompletasaun ho susesu ba formasaun Programa EPRG nivel 0 iha Abril 2026, neebe halao iha EBC 3 Maubara ho profesor partisipante nain 21.
Formasaun kompetensia dijital fundamental hetan rezultadu signifikativu, partisipante sira hadia husi pontuasaun mediu 51.67 ba 76.94, neebe reprezenta aumentu konesimentu 48.9%. Profesor nain 7 kualifikadu atu avansa ba sertifikasaun nivel 1, ho pontuasaun kualidade formasaun jeral 86.36%.
Diretur Eskola Mateus da Conceição husi EBC 3 Maubara dehan, formasaun nee ekipa profeser sira ho abilidade esensial iha Google Workspace ba Edukasaun.
“Formasaun ida nee ajuda ami nia profesor sira atu integra teknolojia iha sala-de-aula sira no serve diak liutan ami nia estudante sira,” dehan nia.
Programa nee reprezenta kompromisu Ministeriu nian ba transformasaun dijital liu husi implementasaun chromebook neebe jere, seguru identidade dijital @edukasaun.edu.tl, no hasae kapasidade fazeadamente iha setor ensinu baziku Timor-Leste nian.
Realizasaun ida nee sai posivel liu husi parseria ho Parseria Global ba Edukasaun (GPE) ba apoiu finansiamentu, UNICEF ba koordenasaun no apoiu ba programa, Google ba Edukasaun Indonezia ba perisia teknika no prestasaun formasaun, UNDP ba konteudu tradusaun ba lian tetum.
Ministeriu agradese ba parseiru sira hotu ba sira-nia dedikasaun hodi hametin kapasidade profesor no avansa literasia dijital iha edukasaun Timoroan.
(dom)
