DILI, STLTIMORLESTE.com – Governu Timor Leste ho Igreja Katólika kontinua halo koordenasaun ba preparasaun trasladasaun restus mortais preladu Katolika nain tolu (3) husi Portugal ba Timor Leste (TL), neebe sei halao iha tempu badak nia laran.
Ekipa Governu Timor Leste neebe lidera husi Ministru Planeamentu no Investimentu Estratéjiku (MPIE), Gastão Francisco de Sousa, hamutuk ho ekipa Igreja Katolika, neebe reprezenta husi Konferensia Episkopal Timorense no Bispu Dioseze Baukau, Dom Leandro Maria Alves, to’o ona Portugal atu reforsa koordenasaun ho Governu no Igreja Katolika iha Portugál.
Trasladasaun nee sei lori fila-fali bá Timor Leste restus mortais Dom Jaime Garcia Goulart, Dom José Joaquim Ribeiro no Monsenhor Martinho da Costa Lopes, neebe uluk halao misaun pastoral iha Dioseze Dili no iha kontribuisaun importante ba dezenvolvimentu Igreja Katolika iha Timor Leste.
Durante sekulu XX, preladu sira husi Portugal nee servisu iha Dioseze Dili no kontribui ba kresimentu Igreja lokal, formasaun kleru no hametin fiar povu Timor Leste.
Trasladasaun restus mortais sira nee konsidera nuudar jestu rekonhesimentu ba servisu no misaun sira nian iha Timor Leste, no mos kumprimentu ba sira nia hakarak atu sira nia restus mortais deskansa permanentemente iha rai neebe sira halao sira nia servisu pastoral.
Iha Katedral Metropolitana Dili, restus mortais preladu nain-tolu husi Portugal sei tau hamutuk ho restus mortais Dom Alberto Ricardo da Silva, Bispu Dili no bispu Timoroan dahuluk iha Dioseze Dili. Hamutuk, sira sei simboliza kontinuidade istória no misaun Igreja Katólika iha Timor Leste.
Misa no Omenajen iha Evora
Molok trasladasaun ba Timor Leste, restus mortais Dom Jaime Garcia Goulart no Monsenhor Martinho da Costa Lopes sei simu omenajen iha Évora, Portugál.
Prosesu preparasaun ba trasladasaun restus mortais Dom Jaime Garcia Goulart no Monsenhor Martinho da Costa Lopes husi Carnaxide, Lisboa, ba Évora halao ona. Urna sira ho restus mortais preladu na’in-rua ne’e prevee atu translada ba Igreja Espiritu Santo, Évora, iha 17 Agostu, tuku 10:30.
Enkuantu iha 19 Agostu, tuku 21:30, Arsebispu Évora nian, Dom Francisco Senra Coelho, sei prezide Misa Eukaristia Akollimentu no entrega ofisial iha Igreja Espiritu Santo, Évora.
Misa no serimonia nee sei transmiti liu-husi kanal dijital ofisial sira Arkedioseze Évora nian, no sarani Timoroan sira iha Portugal no iha rai seluk mos bele akompanha no partisipa iha momentu importante ne’e.
Serimonia iha Évora mos iha signifikadu espesial, tanba aleinde marka despedida iha Portugal, eventu nee fo sai komunaun no unidade entre Igreja Katolika Portugal no Igreja Katolika Timor Leste, neebe iha ligasaun istorika liu husi evanjelizasaun, misaun no amizade neebé dura too ohin loron.
Preparasaun iha Timor Leste
Iha Timor Leste, Governu no Igreja Katolika halo ona preparasaun ba misa no resepsaun restus mortais sira nee, inklui preparasaun fatin iha Prasa Tasi-Tolu no Aeroportu Internasionál Prezidente Nicolau Lobato, Dili.
Tuir programa, depois simu iha Aeroportu Internasional Prezidente Nicolau Lobato, restus mortais sira ne’e sei lori ba Laleia, Munisípiu Manatutu, molok kontinua ba Tasi-Tolu no, ikus mai, ba Igreja Katedral Metropolitana Dili.
Programa trasladasaun nee tau importansia ba fo onra no prezerva memoria preladu Katolika sira neebe servisu iha Timor Leste, no hametin liután ligasaun fiar no amizade entre povu Timor Leste no Igreja Katolika.
Preladu Sira Neebe Servisu iha Dioseze Dili
Preladu Katolika nain tolu neebe restus mortais sei translada husi Portugal ba Timor Leste maka:
- Dom Jaime Garcia Goulart, Bispu Dili (1941 – 1967);
- Dom José Joaquim Ribeiro, Bispu Dili (1967 – 1977);
- Monsenhor Martinhoda Costa Lopes, Admistrador Apostoliku Dioseze Dili (1978 – 1983).
Restus mortais sira nee sei deskansa iha Katedral Metropolitana Dili hamutuk ho Dom Alberto Ricardo da Silva, Bispu Dili (2004 – 2015), ne’ebé nia restus mortais sei muda husi Rate Maloa ba Katedral Dili.
Preparasaun Urna Sira
Jerente Agência Funeraria husi Portugal, José Grilo, informa katak prosesu preparasaun urna sira hahú ona, no agência funeraria sei responsabiliza prosesu tomak to’o akompanha urna sira ba Aeroportu Portugal no kontinua prosesu trasladasaun ba Timor Leste.
Programa trasladasaun restus mortais preladu nain tolu ne’e sei sai nuudar momentu istoriku ba Igreja Katolika iha Timor Leste, liu-liu tanba sei halibur fila-fali iha Katedral Dili lider sira Igreja nian neebe iha kontribuisaun importante ba istoria evanjelizasaun no dezenvolvimentu Igreja iha Timor-Leste.
(alb)
