DILI, STLTIMORLESTE.com – Prezidente Tribunal Rekursu (PTR) kontinua kompostu husi koletivu neebe antes nee iha ona, hodi julga prosesu kontinuasaun sira, neebe antes nee halao julgamentu ba.
Iha loron Tersa (29/04/2025), Tribunal la konsege halao julgamentu ba kazu Jose Bernardo nia mate iha sela Kaikoli, ho razaun Juiz Adjuntu Afonso Carmona simu pose husi Prezidente Republika sai hanesan Prezidente Tribunal Rekursu.
No julgamentu neebe halao iha loron Kuarta (30/04/2025), PTR neebe simu ona pose kontinua akompanha ba prosesu kontinuasaun nee, hodi rona sasin sira. Ho nunee, prosesu kontinuasaun nee kontinua lao, ho koletivu neebe kompostu husi Juiz Prezidents Jose Escurial, no Juiza Adjunta Fransica Cabral, no Juiz Adjuntu Afonso Carmona.
Iha mos prosesu kontinuasaun konaba sosa Roo iha Ministeriu Edukasaun, Juiz Carmona mos kontinua hanesan Juiz Adjuntu, hodi prienxe koletivu neebe iha hodi rona alegasaun husi Ministeriu Publiku no Defeza ba kazu nee.
Iha fatin hanesan, Jurista Sergio Dias Quintas dehan, se kazu ruma maka Prezidente Tribunal Rekursu kompostu iha koletivu hodi julga kazu nee iha Primeira Instansia, ba prosesu kontinuasaun deit prosesu foun nian la kaer ona, se nia la kompostu iha koletivu nee bele prejudika no demora prosesu liu-liu ba sidadaun sira neebe buka justisa.
“Kuandu parte sira la aseita desizaun Tribunal nian rekore ba iha Tribunal Rekursu, Prezidente Tribunal Rekursu labele kompostu fali iha Koletivu Tribunal Rekursu hodi foti desizaun ba rekursu nee, bainhira nia kompostu hela iha Tribunal Primeira Instansia, parte ruma rekore ba iha Tribunal Rekursu, nia labele kompostu fali iha Tribunal Rekursu,” dehan nia.
Jurista nee hatutan, PTR labele inklui hodi foti desizaun ba prosesu sira neebe nia kompostu koletivu iha Tribunal Primera Instansia, tanba se akontese bele iha konflitu de interese no fiar ida nee sei la akontese. No koletivu seluk maka bele foti fali desizaun ba rekursu nee.
(ter)
