DILI, STLTIMORLESTE.com — Reazente teste HIV iha Instituto Nacional de Farmácia e Produtos Médicos (INFPM) stok laiha, nune’e teste ba komunidade sira enfrenta limitasaun.
Servisu Munisipál Saúde Dili (SMS-Dili), Mateus Pinto informa katak, reazente teste HIV iha INFPM atualmente stok laiha.
Nia hatete, situasaun ne’e akontese bainhira pedidu teste HIV aumenta, liuliu ba atividade sosializasaun.
“Agora reazente teste HIV stok laiha. Hau rona prosesu kompras lao hela, maibé sei hein to’o sira mai,” hatete Mateus Pinto.
Nia hatete, falta reazente bele afeta esforsu pesoál saúde atu halo teste ba komunidade sira ne’ebé partisipa atividade INCIDA.
“Ita hakarak halo teste ba komunidade sira durante atividade INCIDA, atu sira bele hatene sira-nia status HIV,” nia deklara.
Mateus informa katak, SMS-Dili halo pedidu ba INFPM atu fornese reazente teste HIV, maibé resposta depende ba disponibilidade stok.
“Iha tempu ida, INFPM bele fó resposta katak reazente iha ona, maibé se stok laiha, ita hein to’o iha disponibilidade,” nia ko’alia.
Nia sublinha katak, teste HIV importante atu komunidade hatene sira-nia status, liuliu bainhira partisipa iha atividade edukasaun kona-ba HIV.
(jen)
