DILI, STLTIMORLESTE.com – Aeroportu Internasional Nicolau Lobato, Komoro, Díli, laos ona fatin ba viajen baibain, maibe nakfilak ka transforma ona ba odamatan matan been neebe sulin ho laran kanek no trajedia sosial fahe malu nian neebe akontese kada loron. Iha ninin aeroportu rede besi neebe harii metin sai hanesan lia fuan neebe nonok, hodi simu mata been husi inan ho aman sira, neebe tenke husik sira nia oan ba ema nia rai, tanba iha rai laran mehi ba moris diak hahu lakon ona.
Realidade iha meudia neebe manas liman barak kaer metin ba lutun besi, fihir ba aviaun neebe foti oan sira semo ba dook. Sira lao laos tanba hakarak pasiar, maibe tanba dudu husi responsabilidade hodi sustenta família iha foho no knua.
Tanba rede aeroportu nee sai simbolu ba Governu nia falhansu hodi kria kampu servisu. Nia rona orasaun neebe hatoo ho lian kman, sente liman neebe nakloke ho laran susar no rai segredu husi fuan neebe kanek bainhira familia tenke fahe malu ba tempu neebe naruk.
Nunee iha sorin ida rede nee fo fiar katak loron ida oan sei fila ho osan hodi harii moris no lori alin sira ba naroman edukasaun nian. Maibe husi sorin seluk rede nee hatudu realidade moruk ba Estadu neebe haree matenek nain sira nadodon fali ba rai liur hodi husik hela sira nia rai.
Bainhira diskursu politika sira kolia kona-ba progresu, realidade iha rede ninin aeroportu hatoo istoria neebe lá hanesan. Joven sira neebe kaer diploma iha pasta laran, tenke hakat liu rede besi nee hodi ba servisu iha estranjeiru.
Nuudar bareira fahe malu entre domin familia nian no sustentabilidade moris. Ida nee hatudu katak ba povu kbiit laek, mehi dala barak tenke sakrefika ba estranjeiru hodi bele sosa fali aihan ba família. Governu enfrenta dezafiu boot ida atu asegura katak, joven sira bele moris ho dignu iha sira nia rai rasik laos ba haburas fali ema seluk nia rai.
Iha bareira besi neebe manas nee, sasin neebe senti loloos laran kanek ka todan husi fahe malu nee mak, inan ho aman neebe entrega sira nia oan ba buka servisu iha tasi balu (rai liur).
“Haree oan sira liu husi rede nee hakat sae ba avisun,hau senti rai nee foti dadaun hau nia kbiit, iha fatin despedida nee, rede sai lina sakrefisiu nian entre ami nia domin no nesesidade bazika família nian. Ami hein deit katak loron ida oan sira bele fila ho susesu hodi harii fali sira nia knua rasik neebe agora dadaun mamuk hela,” hatete aman Armando da Costa neebe lori nia oan ba Aeroportu, Komoro, Díli, Tersa (12/05/2026).
Haree ba rede ninin aeroportu nian, Observador Ekonomia, José Soares afirma laos deit ema neebe buka osan mak iha neeba, maibe ema neebe buka fali sira nia dignidade. Triste tebes bainhira joven ida ho diploma tenke hakat liu rede nee hodi ba servisu iha ema nia rai, tanba oportunidade iha raí laran seidauk nakloke ba ema hotu, rede nee mak fronteira fahe malu entre domin familia nian no nesesidade hodi buka moris.
“Bainhira mak rede nee sai deit hanesan sasin ba ita nia joven sira halai sai ba buka servisu iha ema nia rai. Too tempu ona rede nee labele sai deit mehi neebe dook, maibe sai hanesan odamatan neebe loron ida sei simu fali ita nia foin sae sira ho susesu no dignidade iha ita nia rai rasik Timor-Leste,” dehan nia.
(car)
