DILI, STLTIMORLESTE.com – Tribunal Judisial Primeira Instansia Dili (TJPID) iha loron Sesta (14/08/2026) halao prosesu primeiru interogatoriu ba arguidu nain 8.
Arguidu nain 8, autoridade seguransa desmantela iha loron 11 fulan Agostu iha area Vila Verde.
Arguidu sira submete mai iha Tribunal, Prokurador promove arguidu nain 8 ho krime Jogu Ilisitu previstu iha artigu 322 husi kodigu penal, Krime Asosiasaun Kriminoza previstu iha artigu 188 husi Kodigu Penal, Krime Brankamentus Kapitais previstu iha artigu 313 husi Kodigu Penal, no krime Burla Informatika previstu iha artigu 268 husi Kodigu Penal Timor Leste nian.
Juiz turnu Marcolino dos Santos Olivera, rona tiha arguidu sira nia deklarasaun, deside tama ba alegasaun husi parte Ministeriu Publiku no defeza.
Iha alegasaun, Prokurador solisita ba iha Tribunal atu aplika ba arguidu nain 8 medida tolu, medida kausaun kada arguidu ho osan 4 mil, medida Aprezentasaun Periodika, no medida Proibisaun ba Auzensia.
Aleinde husi parte defeza nian, entende katak buska no detensaun sira nee ilegal, tamba la tuir formalidade neebe hakerek iha ita nia kodigu prosesual, tamba sira tama iha madrugada sem mandadu. Husu Tribunal apresia kestaun sira nee no halo libertasaun imediata.
Defeza deklara, se Tribunal entende seluk husu atu aplika medida kausaun kada ema ida husi rihun US$ 200 too iha rihun US$ 250.
Rona tiha alegasaun, Tribunal adia ba iha loron Sabadu, hodi rona despaisu ikus husi Tribunal.
Prosesu nee Prezide husi Juiz Estajiadu Marcolino dos Santos Oliveira, Ministeriu Publiku reprezenta husi Prokurador nain ida, arguidu sira hetan asistensia legal husi Advogadu Privadu.
(ter)
