DILI, STLTIMORLESTE.com – Tribunal Judisial Primeira Instansia Dili (TJPID) iha loron Sabadu (15/08/2026) liu husi despaisu ba prosesu primeiru interogatoriu, deside aplika medida Termo Identidade Rezidensia (TIR) ba arguidu nain 8, neebe autoridade seguransa desmantela iha loron 11 fulan Agostu iha area Vela Verde.
Juiz turnu Marcolino Dos Santos Oliveira liu husi despaisu ikus deside aplika medida TIR ba arguidu nain 8.
Arguidu sira submete mai iha Tribunal, Prokurador promove arguidu nain 8 ho krime Jogu Ilisitu previstu iha artigu 322 husi kodigu penal, Krime Asosiasaun Kriminoza previstu iha artigu 188 husi Kodigu Penal, Krime Brankamentus Kapitais previstu iha artigu 313 husi Kodigu Penal, no krime Burla Informatika previstu iha artigu 268 husi Kodigu Penal Timor Leste nian.
Antes nee iha alegasaun, Prokurador Domingos Gouveia Leite solisita ba iha Tribunal atu aplika ba arguidu nain 8 medida tolu, medida kausaun kada arguidu ho osan 4.000, medida Aprezentasaun Periodika, no medida Proibisaun ba Auzensia.
Aleinde husi parte defeza nian entende katak, buska no detensaun sira nee ilegal, tanba la tuir formalidade neebe hakerek iha ita nia kodigu prosesual, tanba sira tama iha madrugada sem mandadu. Husu Tribunal apresia kestaun sira nee no halo libertasaun imediata.
Defeza deklara, se Tribunal entende oin seluk husu atu aplika medida kausaun kada ema ida husi US$ 2000 too iha US$ 2500.
Prosesu nee prezide husi Juiz turnu Marcolino dos Santos Oliveira, Ministeriu Publiku reprezenta husi Prokurador Domingos Gouveia Leite, arguidu sira hetan asistensia legal husi Advogadu Privadu.
(ter)
