DILI, STLTIMORLESTE.com – Prezidente Republika (PR), Jose Ramos Horta hatete, presiza halo reforma ba membru Polísia Nasional Timor (PNTL) neebe idade avansadu ona, maibe ida nee kompetensia husi Governu nia.
Prezidente Republika Jose Ramos Horta hatoo kestaun nee ba jornalista sira, bainhira remata partisipa Seminariu Nasional ba loron Aniversariu PNTL ba dala XXV ho tema “Hamutuk Ita Hametin Konfiansa Polisia Nasional Timor Leste”, iha Sentru formasaun PNTL, Komoro, Dili, Tersa (11/03/2025).
“Nee tenke ser, tanba polisia nee oin seluk, klaru balu servisu iha kuartel hanesan ema sivil baibain, maibe polisia nee responsabilidade seluk ida kuandu idade 60 anos ona labele iha loron manas, nee hau entrega 100% ba Governu nia kompetensia nee mak ministru nee sira nia papel 100% full time ba ida nee,” katak PR, Horta.
Nia dehan, atu halo reforma ba membru Polisia Nasional Timor Leste (PNTL) nee kompetensia Governu no Ministru, tanba Ministru iha esperiensia polisia nia kondisaun oinsa, no esperiensia tinan 20 resin ona haree saida mak sala, saida mak los husik sira hadia ba para fulan ruma nia laran tinan ruma nia laran haree buat neebe presiza reforma sira implementa.
Tanba iha ASEAN laran maioria sira nia forsa defeza seguransa profisional diak los, maibe iha ida ka rua sei araska, ida Mianmar, kompara Timor Leste ho Mianmar, Timor Leste iha lalehan Mianmar iha infernu, maibe rai seluk tulun Timor Leste, no iha ASEAN laran Indonezia parseiru Timor Leste numeru um.
“Tanba Indonezia esperiensia oitenta anos rai ida ita bele hatete riku no apoiu ita makaas, ida fali Australia, parseiru rua nee importante, pois Portugal, no Portugal mos sempre tinan sira nia laran nee apoiu ita makaas, la presiza parseiru barak,” katak PR, Horta.
Xefe Estadu hatete, importante ba oin haree aleinde buat neebe Governu halo infraestrutura liu-liu iha Fronteira nee hanesan imajen mos, Polisia iha fronteira tanke Top Kuality, Top Vensimentu, Top Intensivu, sira nia hela fatin, sira nia mobilidade vensimentu, buat sira nee hotu tenke kualidade.
Nunee mos Ministru Interior, Francisco da Costa Guterres hatete, oras nee daudaun Governu liu husi Ministeriu Interior halo hela promosoens no rekrutamentu, tinan oin mak halo reforma ba membru PNTL neebe idade avansadu ona.
“Agora nee ami iha faze tolu mak lao, agora daudaun promosoens, segundu tama ba nee bolu rekrutamentu, terseiru ami tama ona ba reforma iha tinan oin, tinan oin tama reforma, tinan ida nee tama rekruta lai, reforma hotu ema laiha tiha pois ema dehan polisia laiha,” katak Ministru Interior, Francisco.
(eme)
