DILI, STLTIMORLESTE.com – Bankada FRETILIN no Partidu Libertasaun Popular (PLP) sei husu Tribunal atu fiskaliza artigu 12 husi prpoposta lei numeru 15/VI, kona-ba rekrutamentu Majistratura Judisial no mos Defensoria Publika husi ema estranjeiru, hanesan viola prinsipiu soberonia.
“Bankada FRETILIN no PLP hasai komunikadu imprensa ida nee hodi hatoo ba publiku tomak katak, aprovasaun Lei nº 15/VI (29) – Primeira alterasaun ba Lei nº 1/2017, de 18 de janeiru, Rejime Transitorio de Rekrutamento Magistradas no Defensores Publikus naun Timorenses no segunda alterasaun Lei nº 9/2011, de 17 agosto, neebe aprova organika ba Kamara de Kontas no ba Tribunal Superior Administrativo, Fiscal no Contas, viola prinsipiu soberonia nasional nian,” hatete Deputada Maria Angelina Sarmento liu husi konferensia imprensa neebe halao iha sala Bankada FRETILIN, Kuarta (26/02/2025).
Nia hatutan, iha Lei ida nee duni Governu hatama introdus, liu husi artigu 12° A, kona-ba Exersisiu Pleno Funsoens, alinea 1, nebe dehan katak Juiz sira nebe admitidu liu husi konkursu nebe regula tuir Lei ida ne, bele ho exepsaun, ezerse funsaun jurisdisional iha Tribunal Judisial Primeira Instansia nian, iha Tribunal Rekursu, iha Tribunais Administrativos Primeira instansia, no iha
Tribunal Supremu Administrativu, Fiskal no Kontas, inklui kamara kontas.Bainhira halo nomeasaun ba Magistrado estrangeiro (Não Timorense) hodi ezerse Funsaun Jurisdisional Plenu, kompromete ona soberania nasional, tanba transfere parte husi poder Estado nian ba individuo sira nebe la hola parte iha estrutura politika no jurídika Nasaun Timor Leste nian. Poder atu julga ka halo julgamento, knaar ida direta Autoridade Estadu nian no sidadaun Nasional deit mak bele ezerse, hodi garante katak justisa halao sem iha influensia externa.
Ho prinsipiu ba defeza Soberania Estadu nian no Integridade iha Sistema Judisiariu Timor-Leste nian, iha Votasaun Final Global Bancada FRETILIN no Bankada PLP iha Votasaun Final Global ba Proposta Lei n” 15/VI (29)-Primeira olterasnun ba Lei nº 1/2017, de 18 de janeiro Regime Transitório de Recrutamento de Magistrados e Defensores Publikus laos sidadaun Timorenses no segunda alterasaun Lei nº 9/2011, 17 de agosto, deputado sira husi bankada FRETILIN no Bankada PLP nian vota kontra.
“Ami nia haree katak Governu ho nia maioria iha Parlamentu Nasional halao hela tentativa atu fera soberania no integridade Orgaun Judisial nian, nunee atu salva guarda integrididade no independensia Orgaun Judisial nian, ami sei husu Fiskalizasaun Abstrata Konstituisionalidade ba artigu 12º A,” dehan nia.
(alb)
