DILI, STLTIMORLESTE.com – Reprezentante Santa Se iha Timor Leste (TL), Nunsiu Apostoliku, Monsenhor Marco Sprizzi husu sarani iha TL atu reza ba Papa Francisco neebe oras nee halo hela tratamentu iha Hospital Gemelli, Roma.
“Hanesan ita boot sira hatene katak, Papa Francisco oras nee sofre hela moras, tanba nee husu ita boot sira nia orasaun, atu nunee nia bele rekoopera fila fali hodi halo fali nia atividade servisu,” hatete Monsenhor Marco Sprizzi liu husi intervensaun iha konferensia dahuluk Grupu Karismatiku Katoliku Timor Leste iha CCD, Sabadu nee (22/02/2025).
Entretantu Papa Francisco, dezde Sesta (14/02/2025) too agora sei halo hela tratamentu ba nia saude iha Hospital Gemelli, Roma, tanba sofre moras Pneumonia iha nia pulmaun, neebe rezulta nia kondisaun kompleksu oituan.
Antes nee, Papa Francisco susar atu dada iis kauza husi moras Bronkitis no infesaun polimikroba, neebe halo nia kondisaun grave liu. Papa Francisco agora daudaun hetan tratamentu antibiotiku no ho terapia.
Vatikanu kansela hotu ona ajenda ofisial Papa Francisco too semana oin hodi bele garante nia kondisaun bele rekupera lalais.
Maske Papa Francisco hasoru problema oin-oin relasiona ho nia saude dezde 2021 hanesan hernia, intestines (tee-oan boot) no moras iha nia ain tunur neebe halo nia tenke uza kadeira roda, Papa Francisco hatudu forsa nafatin ba nia aan no husu sarani Katoliku iha mundu reza ba nia iha faze susar hanesan agora nee.
Papa Francisco antes nee vizita mai Timor Leste iha 9 too 11 Setembru 2024 tinan kotuk, sarani sira besik milhaun ida husi rai-laran nomos rai-liur, hamutuk halibur malu tuir misa neebe lidera rasik husi Papa Francisco iha Tasi-Tolu, Dili.
(alb)
