DILI, STLTIMORLESTE.com – Akademista sira husu Komandu Jeral Polisia Nasional Timor Leste (PNTL) atu garante prosesu reteste ba kandidatu rihun 12.877 ho transparente no justu, hafoin Primeiru Ministru Kay Rala Xanana Gusmao kansela rekrutamentu anterior tanba iregularidade maka’as.
Akademista UNTL, Silvino da Silva hatete desizaun kanselamentu husi Primeiru Ministru ne’e hatudu kompromisu boot Governu nian,,hodi kombate iregularidade iha instituisaun seguransa.
“Esperiensia kanselamentu rekrutamentu tanba iregularidade fo ona lisaun boot. Agora Komandu Jeral tenke hatudu prosesu ne’ebe transparente, la iha KKN, no tuir meritu,” Silvino da Silva dehan ba STL, iha Dili, Kuarta (16/09/2026).
Tuir nia, numeru 12.877 ne’e boot tebes, tan ne’e presiza mekanizmu kontrolu ne’ebe rigorozu, hodi evita iregularidade hanesan foin lalais ne’e.
“Publiku hein hela ho preokupasaun. Se reteste nee la transparente, sei hafraku fiar povu ba instituisaun seguransa. PNTL tenke hatudu profesionalizmu hahú husi rekrutamentu,” nia esplika.
Nia hatete, agora servisu todan nee iha Komandu PNTL nia liman, atu hadia fali konfiansa povu nian liu husi reteste ne’ebe moos.
“Desizaun PM Xanana atu kansela ne’e pasu pozitivu. Agora Komandu nia responsabilidade atu garante reteste la’o ho diak, justu ba ema hotu,” nia akresenta.
Iha parte ketak, Observador Politika, Martinho Soares apresia pasu PM Xanana nian, maibe husu atu Komandu PNTL labele halo sala dala rua.
“Primeiru Ministru halo ona desizaun ne’ebe loos, agora ita hotu matan ba Komandu. Reteste ba 12.877 nee tenke sai oportunidade atu hatudu katak PNTL moris foun, laos kontinua kultura tuan ne’ebe estraga konfiansa,” Martinho Soares dehan.
Nia sujere PNTL tenke publika kriteriu, envolve sosiedade sivil no media, iha prosesu monitorizasaun atu garante laiha interferensia.
“Se la transparente, lakuna boot sei mosu fali. Povu hakarak haree polisia ne’ebe kualidade, laos polisia tanba koneksaun,” nia hatutan.
Entretantu antes nee Komisariu Prezidente Juri reteste rekrutamentu PNTL 2026, Komisariu Asistente Polisia Jose Soares, relata katak prosesu reverifikasaun dokumentu konklui ona. Nia dehan, Sekretariadu submete ona rezultadu ba Komandante Jeral PNTL no Ministeriu Interior (MI). Rezultadu sei publika iha Jornal da Republika.
“Sekretariadu konklui ona reverifikasaun. Ita sei entrega rezultadu ba Jornal da Republika ba kadete 12.877,” hatete Komisariu Prezidente Juri reteste rekrutamentu PNTL 2026, Komisariu Asistente Polisia, Jose Soares.
Nia esplika, prosesu la’o tuir Diploma Ministerial Nu. 35/2026. Prinsipiu ne’ebe kaer mak meritu, transparensia no akontabilidade.
(car)
