DILI, STLTIMORLESTE.com – Partidu Libertasaun Popular (PLP) foti pozisaun klaru hodi kestiona fali dalan neebe Estadu uza hodi jere riku soin nasaun nian, liu-liu fundu sira neebe rai iha banku estranjeiru. PLP konsideira katak realidade moris povu nian iha baze la hanesan ho numeru osan neebe nasaun iha, tanba benefisiu ekonomika sira nee konsentra deit iha grupu elite balu nia liman.
Visi Prezidente Partidu Popular (PLP) ba Assuntu Orgaun Asosiadu no Movimentu, Amilcar dos Reis Araujo “Hatenu” hatete, osan povu nian neebe rai iha Banku Amerika no instituisaun internasional seluk loloos tenke suli hodi hamoris kualidade moris sidadaun hotu nian, laos halo bokur fali ba grupu kiik ka elite balu mak goza ho prozetu boot sira.
“Ita labele admite katak riku soin nasaun nian grupu balu deit mak goza , enkuantu povu kiik kontinua luta hodi hetan asesu ba bee moos, naroman no estrada neebe diak. Ida nee kontradis ho prinsipiu libertasaun povu nian,” dehan Amilcar ba STl, iha nia rezidensia, Manleuan, Dili, Kinta (09/04/2026).
Amilcar kestiona mos tanba sa osan neebe rai iha estranjeiru seidauk bele transforma sai investimentu neebe lori kbiit ba setor produtiva rai laran. Nia ezije ba Governu atu foti kestaun nee hodi halo reforma ba sistema distribuisaun rekursu nasional, nunee sirkulasaun finanseiru bele too duni ba iha area rural sira.
Aleinde nee, Visi Prezidente Partidu Popular (PLP) ba Assuntu Orgaun Asosiadu no Movimentu nee mos husu transparensia neebe klaru liu tan kona-ba oinsa osan sira nee suli no se loloos benefisia husi fundu Estadu nian durante nee. Ba Amilcar, luta ba libertasaun povu nian sei la komppletu se kbiit ekonomika nasaun nian seidauk fahe ho hanesan ba sidadaun hotu.
Iha parte ketak, Akademista UNTL, Jose Magno Xavier hatete, osan neebe rai iha estranjeiru loloos sai fali instrumentu ba dezenvolvimentu nasional neebe inkluzivu. Maibe realidade iha terrenu hatudu katak, sirkulasaun finanseiru nee seidauk fo impaktu makas ba dezemvolvimentu kbiit povu nian iha baze.
“Ita labele husi osan povu nian sai deit hanesan numeru iha Banku estranjeiru sira. Probelma boot oinsa osan nee bele suli fali mai rai laran hodi kria kampu servisu no hamoris setor protivu,” dehan Jose.
(car)
