MATEBIAN, STLTIMORLESTE.com – Fundador no Komandante FALINTIL, Rogero Tiago de Fatima Lobato hatete, iha 20 Agostu sira hatun bandeira Portugal hasae fali bandeira FRETILIN.
Fundador no Komandante FALINTIL iha tinan 1981-1993, Rogero Tiago de Fatima Lobato ba jornalista sira iha Matebian Baucau, Kinta (20/08/2026) hatete, iha 20 Agostu sira hatun bandeira Portugal no hasae fali bandeira FRETILIN hodi hatudu ba inimigu sira katak FALINTIL sei eziste ho objetivu ida katak mate ka moris ukun rasik aan.
Lider Rezistensia Rogero Lobato hatete, momentu sira hatun bandeira Portugal labele hasae bandeira Republika Demokratika Timor Leste (RDTL) tanba seidauk proklama, tanba nee hasae bandeira FRETILIN.
“Sira tenke tau naran ida nee tanba ami iha Kuartel Jeneral Taibesi, iha 20 Agostu ami hatun bandeira Portugal nia seidauk hasae bandeira RDTL, tanba ita seidauk proklama Republika momentu nee hasae bandeira FRETILIN, entau ami hasae Bandeira FRETILIN, signifika saida, katak soldadu sira hotu neebe hasae bandeira FRETILIN nia katak sai forsa FRETILIN nia.
Tanba sa iha tempu neeba hili naran Forsa Armada Libertasaun Nasional Timor Leste (FALINTIL) no hili mos data iha 20 Agostu? hatan ba kestaun nee lider rezistensia nee hatete, tau naran FALINTIL nee desizaun husi CCF.
“20 Agostu kuandu ba hau iha Aileu lori ordem Governador hatoo ba FRETILIN momentu nee visi Prezidente FRETILIN dehan bainhira mak kaer malae sira, hau rasik dehan ba nia katak iha Agostu atu kaer malae sira maibe sira antes 20 Agostu sira kaer ona malae sira iha Aileu ona nee hau koalia hau nia iha 13 Agostu no iha 15 Agostu sira halo proklamasaun instrusaun jeral iha armada iha 20 Agostu ami kaer malae sira Portugal iha Dili, tanba sira kaer uluk malae iha Aileu maibe iha momentu nee sira la kaer kilat barak kilat barak nee iha Dili,” katak nia.
Nia hatete, iha momentu nee sira kaer kilat barak iha Dili no kontrola mos Dili no tanba Dili hanesan fatin sentru politika militar Portugal nia.
Nia hatete, antes fo ordem ba membru sira nee laos buat fasil maibe liu husi halo reuniuan boot besik komandante Joao Branco ho sira lubuk ida husi destakamentu material sira balun husi enjeneria no seluk tan halo reuniuan hamutuk mak halo levantamentu. Nia hatete sira foti kilat iha Dili iha 20 Agostu sira foti kilat husi inimigu sira besik rihun ida.
Nunee mos Xefe Estadu Maior Jeneral FALINTIL-Forsa Defeza Timor Leste (F-FDTL), Tenente Jeneral Domingos Raul “Falur Rate Laek” liu husi diskursu hatete, selebra tinan 51 hahu husi kriasaun FALINTIL, Forsas Armadas ba Libertasaun Nasional Timor Leste, ho tema neebe halibur Onra ba Martires, Kompromisu ba Estabilidade no Dame.
“Loos duni iha loron ida nee, tinan lima-nulu-resin-ida liuba, mak Komite Sentral FRETILIN, hasoru malu iha Aileu, foti desizaun istorika neebe muda ita-nia povu nia destinu: kriasaun Forsa Armada ba Libertasaun Nasional Timor Leste nian, FALINTIL. Ho respeitu klean maka ohin ita hanoin hikas eroi no eroína sira neebe lakon sira nia vida iha Matebian ema sivíl, militares, labarik, ferik no katuas sira neebe mate durante períodu naruk serku no anikilamentu neebe foho lulik ida-nee hasoru. Ba sira, no ba sira iha fatin sagradu barak seluk iha Timor-Leste neebe sai sasin ba ita-nia povu nia terus,” Jeneral Falur.
Martir Timor-oan sira hotu, mezmu sira neebe mai husi partidu oin-oin no ho ideolojia oin-oin, maibe, liu liu, sira timoroan oan husi rai ida neebe fo moris ba ema hotu. No mos ho gratidaun boot hanoin hikas komandante FALINTIL sira no Diresaun FRETILIN neebe reziste hamutuk ho too remata.
(eme)
