MATEBIAN, STLTIMORLESTE.com – Fundador no Komandante FALINTIL, Rogero Tiago de Fatima Lobato hatete, tempu ona lider sira hamutuk halo rekonsiliasaun luta ba povu nia moris diak.
Fundador no Komandante FALINTIL iha tinan 1981-1993, Rogero Tiago de Fatima Lobato ba jornalista iha Matebian Baucau Kinta (20/08/2026) hatete, ohin selebra ona tinan 51 ejistensia FALINTIL iha Timor Leste husu kaer metin nafatin esperito luta atu hadia rai ida nee defende rai ida nee esperito atu didika aan tomak ba rai ida nee tau aas intrese povu dukue intrese pesoal.
Iha biban nee Fundador FALINTIL hatete, nia sente haksolok rona diskursu husi Xefe Estadu Maior Jeneral FALINTIL-Forsa Defeza Timor Leste (F-FDTL), Tenente Jeneral Domingos Raul “Falur Rate Laek nebee kapaas fanu lider sira hamutuk hodi lori rai nee ba oin.
“Ohin hau gosta tebes Komandante Jeneral Falur Rate Laek nia diskursu, diskursu ida neebe kapaas, tempu ona para halo ona rekonsiliasaun iha luta povu nia, iha tempu ita hirus malu iha tempu hola parte malu, hanesan Jeneral dehan ema barak mate nee laos inimigu deit mak oho, ita ho ita mos oho malu, neebe hau sente katak Kelikai nee rai ida espesial tebes tanba Komandate Aquelis, Komandante Fonciano ema sira nee sempre lao hamutuk hahu prosesu ida nee maibe iha prosesu nee laos inimigu mak oho sira, ita nia maluk rasik mak oho fali sira, buat nee signifika saida, katak ita iha duni problema barak iha ita nia laran ita tenke hadia, ita tenke rekonsiliasaun nee tenke sai husi ita nia laran para ba oin labele repete tan eru sira neebe komete iha pasadu,” katak Lider Rejistensia.
Nia hatete, tempu ona loke laran ba malu ho fuan neebe nakonu ho pas, unidade nasional, nunee bele hamutuk lori rai nee ba oin.
“Tempu ona para ita loke laran ba malu, ita tenke kontrola mak ibun tanba liafuan nee iha forsa, tanba ita hakarak hamutuk maibe se ita la sukat ita nia liafuan halo lider bele se kotuk ba malu, liafuan nee mak tenke koalia konaba pas, dame koalia konaba perdua malu, se perdua malu liberta husi odi vingansa husi buat barak,” dehan Lider Rezistensia Rogero Lobato.
Nunee mos Xefe Estadu Maior Jeneral FALINTIL-Forsa Defeza Timor Leste (F-FDTL), Tenente Jeneral Domingos Raul “Falur Rate Laek husu sidadaun hotu-hotu neebe hadomi Timor Leste no preokupa ho nasaun nia imajen iha relasaun ho soberania nasional, apelu ba hotu hotu kontribui ho konhesimentu, informasaun no esforsu tomak neebe nesesariu hodi kombate laloran foun atividade ilegal sira neebe Timor Leste hasoru.
“Hau apela, ho firmeza hanesan, ba setor justisa ida neebe funsiona ho imparsial, neebe serve, liuliu, interese nasional no nunka interese individual ka grupu nian justisa ida neebe promove justisa sosial,” katak nia.
(eme)
