DÍLI, STLTIMORLESTE.com — Sakrifísiu povu nian ba independénsia la’ós atu habokur elite polítika, maibé atu garante moris di’ak no justisa sosiál ba sidadaun hotu, bainhira povu iha baze kontinua hasoru difikuldade moris.
Eis Kordenadór CNRT Konsulta Popular 1999 no eis deputadu Partidu Sosial Demokrata (PSD), Leandro Isaac, kritika situasaun ne’ebé povu nia sakrifísiu durante luta rezisténsia seidauk reflete ho justu iha moris sidadaun sira-nian.
Nia afirma katak luta ba ukun rasik-aan la’ós atu kria klase foun ne’ebé habokur an, maibé atu defende dignidade povu Maubere nian.
“Luta ba ukun rasik-aan iha 1999 la’ós atu kria klase foun ida ne’ebé mai habokur an de’it, enkuantu povu ki’ik ne’ebé sakrifika an kontinua moris iha dezafiu nia laran,” Leandro Isaac dehan ba STL, iha Dili, Kinta (15/10/2026).
Nia husu ba lider polítiku sira atu hamenus ambisaun partidária no tau interese nasionál, moris di’ak povu nian no justisa sosiál nu’udar prioridade aas liu.
Eis Deputadu nee mós apela ba lideransa, atu fila fali ba espíritu unidade nasionál ne’ebé mosu durante Konsulta Popular 1999.
Iha parte seluk, observadór polítiku, António Magno konsidera katak kritika husi figura istóriku sira hanesan Leandro Isaac reflete keixa povu iha baze, ne’ebé sente katak dezenvolvimentu seidauk responde ba sira-nia nesesidade.
“Kritika ne’e la’ós foun, maibé nia mai fó hanoin fali ba elite polítiku sira katak legitimidade hosi ukun rasik-aan ne’e hun rasik iha povu nia sofrimentu no sakrifísiu,” António Magno dehan.
António alerta katak bainhira lideransa la rona povu nia lian, distánsia entre lider polítiku sira no povu eleitór bele sai boot liután.
Nia subliña katak presiza iha korresaun polítika, atu garante riku-soin estadu nian la konsentra de’it iha grupu ki’ik ida.
Akademista Universidade da Paz (UNPAZ), Francisco da Silva, haree kestaun ne’e husi perspetiva edukasaun no dezenvolvimentu sosiál.
Nia dehan katak, dezafiu prinsipál mak transforma kompromisu nasionál sira sai asaun konkretu ne’ebé responde ba nesesidade povu nian.
“Ita presiza muda paradigma dezenvolvimentu nasionál hodi tau atensaun liután ba asesu edukasaun, saúde no kampu servisu ba jerasaun foun,” Francisco da Silva dehan.
Francisco hatutan katak solusaun ba dezafiu sira-ne’e presiza esforsu hamutuk no diálogu entre akademista, polítiku no sosiedade sivíl, atu prevene krize estruturál ne’ebé bele afeta futuru Timor-Leste nian.
(car)
