DILI, STLTIMORLESTE.com – Tribunal Judisial Primeira Instansia Dili (TJPID) iha loron Kuarta nee (05/08/2026) halao prosesu primeiru interogatoriu ba arguidu nain 7, neebe envolve atividade Scamming Call Centre.
Arguidu sira nee desmantela iha apartamentu ida neebe lokaliza iha Suku Fatuhada, Postu Administrativu Dom Aleixo, Munisipiu Dili.
Ministeriu Publiku neebe reprezenta husi Prokurador João Marques.promove arguidu sira ho krime Jogu Ilisitu previstu iha artigu 322, Asosiasaun Kriminoza previstu iha artigu 188, Brankamentus Kapitais previstu iha artigu 313 no Burla Informatika previstu iha artigu 268 husi Kodigu Penal Timor Leste nian.
Juiza Turnu, Maria da Silva Pinto halo tiha identifikasaun ba arguidu sira, ikus mai deside tama ba iha faze alegasaun.
Iha alegasaun nee Prokurador João Marques solisita ba iha Tribunal atu aplika medida haat ba iha arguidu nain 7. Medida haat nee mak hanesan Aprezentasaun Periodika, Proibisaun ba Auzensia, Kausaun kada arguidu US$ 3 mill, no kontinua mantein ho medida Termo Indentidade Rezidensia (TIR) neebe antes nee iha ona.
Aleinde defeza arguidu sira nian, Advogadu Privadu Euzebio solisita ba iha Tribunal atu haree uluk lai konaba mandadu detensaun nee. No defeza mos aseita ho kausaun neebe Prokurador husu, maibe husu Tribunal atu aplika kausaun menus husi US$ 3 mill.
Rona tiha alegasaun, Tribunal adia ba loron Kinta, hodi rona despaisu ikus.
Prosesu nee prezide husi Juiza estajiada Maria da Silva Pinto, Ministeriu Publiku reprezenta husi Prokurador João Marques, arguidu sira hetan asistensia legal husi Advogadu Privadu Euzebio.
Rekorda katak, Polisia Nasional Timor Leste (PNTL) liu husi Diresaun Servisu Investigasaun Kriminal (DSIK) no Diresaun Servisu Informasaun Polísia (DSIP), junta Forsa Polisia hamutuk ho Servisu Migrasaun halao operasaun konjunta hodi desmantela atividade rede Scam Call Centre iha apartamentu ida neebe lokaliza iha Suku Fatuhada, Postu Administrativu Dom Aleixo, Munisípiu Dili.
Entretantu iha operasaun nee ekipa konjunta konsege identifika sidadaun Xineza nain 6 inklui feto ida neebe deskunfia envolve iha atividade Scam Call Centre refere.
Ekipa konjunta kontinua halo aprensaun ba sasan sira neebe uza atu apoia atividade nee, inklui telemovel hamutuk 30, ekipamentu Starlink hamutuk 2 no iPad hamutuk 3.
(ter)
