DILI, STLTIMORLESTE.com – Tribunal Judisial Primeira Instansia Dili (TJPID) iha loron Sabadu (15/08/2026) liu husi despaisu ba rede Scamming Call Centre Bebonuk no Santa Cruz, deside aplika medida 4 ba arguidu nain lima.
Iha despaisu nee, Juiz turnu Rozito Guterres deside aplika medida 4 ba arguidu nain lima. Medida sira nee mak hanesan medida kausaun kada arguidu 3.500, medida Proibisaun ba Auzensia atu sita arguidu sira nia passaporte hodi sira labele sai husi teritoriu Timor, medida Aprezentasaun Periodika atu aprezenta an iha Tribunal semana ida dala rua, no kontinua mantein ho medida Termo Indentidade Rezidensia (TIR) neebe antes nee iha ona.
Konaba medida kausaun, Tribunal fo prazu loron sanulu atu arguidu sira depozita kausaun ba iha Tribunal.
Arguidu sira submete mai iha Tribunal, Prokurador promove arguidu nain 8 ho krime Jogu Ilisitu previstu iha artigu 322 husi kodigu penal, Krime Asosiasaun Kriminoza previstu iha artigu 188 husi Kodigu Penal, Krime Brankamentus Kapitais previstu iha artigu 313 husi Kodigu Penal, no krime Burla Informatika previstu iha artigu 268 husi Kodigu Penal Timor Leste nian.
Antes nee iha alegasaun, Prokurador solisita ba iha Tribunal atu aplika ba arguidu nain 5 medida Prizaun Preventiva.
MP mos deklara katak, se Tribunal entende oin seluk, husu Tribunal atu aplika medida kausaun kada arguidu ho osan 5.000, medida Proibisaun ba Auzensia, no medida Aprezentasaun Periodika semana ida dala rua iha Tribunal.
Enkuantu husi parte defeza nian husu Tribunal atu aplika kausaun kada arguidu ho valor US$ 2500.
Prosesu nee prezide husi Juiz turnu Rozito Guterres, Ministeriu Publiku reprezenta husi Prokurador Domingos Gouveia Leite, arguidu sira hetan asistensia legal husi Advogadu Privadu Ismael Asunsao, no Agustinho de Jesus.
(ter)
