DILI, STLTIMORLESTE.com – Diretor Luta Hamutuk (LH), Jose Alves da Costa konsideira Sekretariu Estadu Asuntu Toponímia no Organizasaun Urbana (SEATOU) laiha fuan ka domin hodi halo eviksaun ba povu, tanba la kria uluk kondisaun.
Nia dehan, Governu iha politika diak hodi halo dezenvolvimentu, maibe antes sobu komunidade sira nia uma presiza kria uluk kondisaun.
“Ita nia Governante sira liu-liu SEATOU laiha fuan, tanba nia halo asaun ka eviksaun despeju administrativu iha tempu neebe laos tempu, tanba agora iha tempu udan, nein prepara kondisaun atu ba iha neebe mos la hatene no fo tempu neebe badak tebes, no halo eviksaun ida nee laiha umanidade,” dehan Jose Alves ba STL liu husi telefone, Sesta (10/01/2025).
Nia dehan, iha nasaun barak iha politika oinsa atu konstrui dezenvolvimentu nasaun, maibe primeiru mak kria uluk kondisaun antes halo eviksaun.
“Laos ita fo uma permanente, laos fo andar diak, maibe minimu nee mahon diak ida iha para sira ba hakmaan iha mahon nee hafoin ita halo, maibe eviksaun neebe mak akontese nee brutalizmu, ema sira neebe mak laiha fuan no laiha sentimentu nee mak halo ida nee, horiseik, hodibainrua SEATOU haruka ita nia inan feton sira neebe afeita ba iha eviksaun fo fatin provizoriu iha Tasi Tolu, maibe la too oras balun ba duni fila fali, ida nee hau hanoin laiha sentimentu humanu,” katak Diretor nee.
Diretor nee hatutan, SEATOU laiha fuan no la konsidera ba inan feton no labarik sira, tanba tempu udan sira konsidera sidadaun sira duni hanesan animal.
Nunee mos Prezidente Republika,Jose Ramos Horta husu atu kria uluk kondisaun antes hasai ka sobu komunidade sira nia uma, tanba komunidade sira hikis kosar mak halo sira nia uma, Governu hakarak hasai presiza kria uluk kondisaun, nunee sira bele hakmaan fali hodi buka moris, tanba povu neebe mak hetan eviksaun nee maioria povu kiik no kiak.
Entretantu, Primeiru Ministru, Kay Rala Xanana Gusmão hatete, komunidade neebe nia uma hetan sobu husi SEATOU, hotu-hotu hetan indemnizasaun.
(eme)
