DILI, STLTIMORLESTE.com – Sekretaria Estadu Formasaun Profisional no Empregu (SEFOPE) liu husi Diresaun Nasional Empregu Estranjeiru (DNEE) kontinua halo rekrutamentu ba trabalhador Timoroan nain 111 atu ba servisu iha Australia.
“Ita sempre halo rekrutamentu ba trabalhador Timoroan sira hodi ba servisu iha Australia, nunee ohin ita kontinua fo rekrutamentu ba trabalhador nain 111, neebe kompostu husi feto nain 28 no mane nain 83, importante liu mak sira tenke moris ho sistema, disiplina servisu,” dehan Diretor Diresaun Nasional Empregu Estranjeiru (DNEE), João Correia Pereira iha salaun Excelsior, Pantai Kelapa Dili, Sesta (13/12/2024).
Nia hatete, trabalhador Timoroan sira nee tuir ona Pre-Departure Briefing (PDB), signifika trabalhador Timoroan sira nee prepara atu ba servisu, nunee trabalhador neebe SEFOPE prepara 111, sira tuir PDB ona, no atu suplika sira ba servisu iha Australia.
Tanba nee husu ba trabalhador Timoroan sira presiza kontinua familiariza aan ho diak atu servisu iha ema nia nasaun ho disiplina, respeita ema nia regulamentu, labele sai husi sistema, maibe moris ho sistema, toba ho sistema too fila.
Diretor nee dehan, importante trabalhador Timoroan sira tenke respeita malu no enkoraja ba ema nia feen ho lae tenki mantein amizade no fo konfiansa ba malu no halo komunikasaun diak, trabalhador tenki tau disiplina, atitude neebe diak, tanba hanoin ba bandeira RDTL no reprezenta nasaun nia dignidade.
Tanba nee husu ba trabalhador sira, hanesan Timoroan presiza hatudu komportamentu neebe diak, labele hanoin atu sai husi sistema, tanba halai sai husi sistema sei fo ameasa, nunee numeru absconding aumenta, no empregador iha Australia tenke hatudu servisu neebe diak iha ema nia nasaun.
Iha fatin hanesan, trabalhador Timoroan, Febriana Gomes Martins hateten, nia agradese tebes ba oportunidade ida nee, no fiar katak mensajen hirak neebe SEFOPE tau hanesan regulamentu, sei kumpri nafatin hodi servisu ho disiplina iha ema nia nasaun too fila mai hodi kontribui fali ba Timor Leste.
Tanba Programa PDB nee realiza tiha ona durante loron tolu nia laran, nunee trabalhador Timoroan neebe atu ba servisu iha Australia, ho objetivu atu fahe informasaun kona-ba kultura no regulamentu balun iha Australia nian, oinsa bele halo servisu ho diak.
“Ami trabalhador Timoroan neebe tuir programa PDB nee, total trabalhador nain 111 kompostu husi feto nain 28 no Mane nain 83, tanba nee husi total trabalhador hirak nee sei ba servisu iha kompanhia 8 mak hanesan Capo Grapeco, Ralphs Meat, Flavorite Tomatoes, Down to Earth, The Trustee for the Connect Group, Hollywood Berries, Ceres Farm, Tasmania Berries,” nia esplika.
Aleinde nee Diretor Jeral SEFOPE, Carlito do Rosario Cabral hatete, trabalhador sira neebe hetan ona oportunidade atu ba servisu iha Australia, hatudu komportamentu iha ema nia nasaun, respeita malu nafatin nuudar Timoroan iha ema nia rain.
Servisu iha Australia atu manan osan no hetan esperiensia foun husi ema nia rain, nunee fila mai bele diversifika ekonomia familia no hasae kresimentu ekonomia nasaun Timor Leste nian liu husi loke empreza kiik sira.
Tanba nee nuudar inan aman, sira nafatin suporta oan sira no enkoraja sira atu servisu ho diak. Parte governu mos husu ba inan ama sira atu kolabora ho governu para trabalhador sira la bele halai husi sistema no prejudika ba maluk Timoroan sira seluk neebe mak hein hela oportunidade neebe mai.
(EST 1)
