DILI, STLTIMORLESTE.com – Tasi-Tolu sei sai sentru foun ba desportu, turizmu no rekreasaun. Governu no FFTL planu ona harii estádiu padraun internasionál iha área ne’e.
Governu ho FFTL sei harii estádiu padraun internasionál iha Tasi Tolu. Lagoa III mós sei sai zona verde no trekking.
Tuir Membru Ezekutivu FFTL, José Luis Oliveira hatete, projetu ne’e la’ós de’it estádiu. FFTL mós sei dezenvolve Lagoa III ba zona verde no zona trekking integradu ba komunidade.
“To’o agora ita seidauk iha estádiu atu reprezenta Timor-Leste. Ita presiza estádiu ne’ebé reprezenta orgullu nasionál,” hatete Membru Ezekutivu FFTL, José Luis Oliveira ba jornalista sira wainhira halao dialogu ho Komunidade sira iha Tasi-Tolu, Tersa (15/09/2026).
Nia esplika, FFTL iha responsabilidade atu konstrui estádiu ne’e ho apoiu FIFA. Rai ne’e governu oferese ba FFTL atu harii infraestrutura desportiva.
José Luis husu kolaborasaun komunidade. “Kolaborasaun ita boot sira, ita bele konsidera aan na’in ba estádiu ida nee,” nia deklara.
Iha fatin hanesan, Diretór Jerál Terras no Propriedade, Lucas António da Costa, Informa, Timor-Leste tama ona ba ASEAN. Rekezitu ASEAN maka Timor-Leste tenke iha estádiu padraun internasionál.
Nia deklara, konstrusaun estádiu no kampu futsal indoor sei okupa rai 12.5 hektare. Governu sei halo levantamentu ba uma no ai-horis iha área ne’e.
Nunee mos, Sekretáriu Estadu Terras no Propriedade, Jaime Xavier, koalia, ho konstrusaun estadiu ne’e, sei hamenus aluga kampu iha rai liur,sie loke estadiu ne’e iha ne’e, atividade jogu internasionál mai iha ne’e, atividade roda ekonomia sei aumenta, tanba ne’e atu dehan ba inan aman sira husi ne’e benefisiu iha ba povu.
“Se ita loke estádiu ne’e, atividade jogu internasionál mai. Roda ekonomia sei aumenta ba komunidade,” afirma.
(jen)
