BOBONARO, STLTIMORLESTL.com – Sekretária Estadu ba Igualdade (SEI), Elvina Sousa Carvalho hamutuk ho estrutura sira hato’o parabéns ba feto Timor-Leste hotu iha ámbitu komemorasaun Loron Nasionál Feto Timor-Leste ba dala-50, ne’ebé komemora iha loron 03 Novembru 2026.
Iha mensajen parabéns ne’ebé STL sita husi pájina ofisiál SEI, Tersa-feira (03/11/2026), Elvina Sousa Carvalho aprezenta tema komemorasaun tinan ida-ne’e, “Feto Timor-Leste, Selebra Tinan 50 Igualdade no Inkluzaun”.
Iha mensajen ne’e, Elvina Sousa Carvalho hateten katak feto no labarik-feto hotu-hotu tenke hetan asesu ba edukasaun, oportunidade ekonómika, lideransa no liberdade atu determina sira-nia futuru, laiha diskriminasaun, violénsia ka eskluzaun.
Nia mós enfatiza katak luta ba independénsia lori ona liberdade ba povu Timor-Leste, no agora iha responsabilidade hametin igualdade, justisa no inkluzaun ba feto hotu-hotu.
Tinan 50 komemorasaun ne’e mós sai momentu importante atu valoriza kontribuisaun feto Timor-Leste iha luta ba independénsia no harii nasaun, hodi asegura katak feto sai lider forte, iha independénsia ekonómika, edukasaun no oportunidade atu partisipa iha prosesu foti desizaun iha nivel hotu-hotu.
Iha Munisípiu Bobonaro, SEI realiza ona atividade preparatória ba komemorasaun ne’e iha Suku Bobonaro Vila, Postu Administrativu Bobonaro, ho serimónia lo’ok bua malus.
Atividade sira-ne’e hetan partisipasaun husi autoridade postu, autoridade suku, lia-na’in, forsa seguransa no reprezentante entidade sira seluk.
(tom)
