DILI, STLTIMORLESTE.com – Konsesaun eskolar ba faze datolu nee husi Ministeriu Edukasaun (ME) seidauk atribui ba eskola sira, tanba too agora seidauk iha informasaun.
Lia hirak nee hatoo husi Manuel Verdial hanesan Diretor Eskola Sekundariu Jeral 10 de Dezembru Comoro ba STL iha nia knaar fatin, Kuarta nee (19/08/2026).
“Konaba konsesaun eskolar nee too agora husi parte ME seidauk atribui osan ida nee mai ami eskola sira, relatoriu ba faze daruak nian ami submete ona ba Ministeriu Edukasaun, no osan mak seidauk sai, tanba too agora seidauk iha informasaun ruma ba asuntu nee, husi ami parte eskola nian hein deit,” nia haktuir.
Manuel dehan, bainhira osan nee ME atribui mak sira sei ezekuta tuir nesesidade eskola nian, hanesan hadia odamatan, janela, sala de aula nian no seluk tan, tanba buat kiik sira hanesan nee bele rezolve lori osan ida nee, maibe ezekuta hotu eskola prepara fali relatoriu hatama fali ba ME.
“Bainhira ita nian governu liu husi ME fo osan ida nee ba ita, ezekuta hotu ita submete fali relatoriu, no ezekuta duni tuir nesesidade eskola nian neebe mak iha, maibe konsesaun eskolar nee seidauk sai too agora,” nia informa.
(jac)
