DILI, STLTIMORLESTE.com – Selebra loron Jesus Divina Mizerecordio iha loron Sabadu (11/04/2026), sarani husi Igreja Nossa Senhora de Grasa kompostu husi Bairu BTN 1, 2 no 3, inklui Raikotu halo prosesaun sai husi Bairu Jesus Divina Mizerecordio Tasi-Tolu lao bá João Paulo, Maslidun no fila fali mai igreja hodi taka novena bá loron ikus nian.
Tuir observasaun STL iha terenu Sabadu nee (12/04/2026) katak, iha parte dader komunidade husi Bairu Jesus Divina Miserecordio avizu no bolu malu hodi halo limpeza iha area kruz joven nian hodi prepara fatin tau imajen Jesus Divina Mizerecordio neebe atu tula ba iha kareta hodi halo prosesaun bá João Paulo, Maslidun no fila fali mai Igreja Nossa Senhora de Grasa Tasi-Tolu.
Prosesaun hahu iha tuku 15:00 OTL, maibe sarani sira halibur malu hamutuk iha fatin nee tuku 14:30 hodi prepara aan antes sai husi Bairu Jesus Divina Miserecordio bá fatin sira neebe temi ona.
Prosesaun nee diriji husi devoto Jesus Divina Miserecordio Nossa Senhora de Grasa akompanha mos husi sarani sira. Durante iha prosesaun nia laran sarani sira hananu no reza tersu Jesus Divina Miserecordio, maske iha loron manas nia laran durante oras 2 ho balun nia laran. Sarani sira mos haksolok no agradese tanba iha loron nee udan laiha.
Depois prosesaun remata, taka ho novena ba loron ikus husi devoto no sarani sira iha igreja, nunee iha Domingu selebra ho misa.
Sarani husi Bairu Jesus Divina Miserecordio, Angela Sorotmalay dehan, prosesaun bá loron ohin nian nee hanesan halo preparasaun ba loron aban Jesus Divina Mizerecordio nian. Neebe devoto sira hahu novena komesa iha dia 3 Abril too ohin halo prosesaun para aban taka ho misa.
Nia hatutan, prosesaun nee hahu husi Bairu Jesus Divina Mizerecordio lao bá João Paulo too Maslidun mai fali Igreja Nossa Senhora de Grasa, hodi kontinua halo novena bá loron da-9 nian.
(dom)
