DILI, STLTIMORLESTE.com – Servisu Edukasaun Munisípiu Aileu distribui ona númeru ezame nasionál no ezame lokál ba direítór eskola sira, atu fasilita preparasaun administrativu ba estudante finalista sira ne’ebé sei tuir ezame iha loron Segunda-feira.
Diretora Servisu Edukasaun Munisípiu Aileu, Beatriz de Deus, hato’o informasaun ne’e ba STL liuhosi telefone, Kinta-feira (15/10/2026).
Nia esplika katak, distribuisaun númeru ezame ba estudante finalista sira hala’o ona iha Segunda-feira, hamutuk ho enkontru ho direítór eskola sira.
“Ami distribui ona númeru ezame ba estudante finalista sira ne’ebé sei tuir ezame nasionál no ezame lokál. Iha Sesta-feira, ami sei ba foti matéria ezame nasionál iha Ministériu Edukasaun (ME), atu lori mai rai iha komandu eskuadra sira, nune’e iha Segunda-feira bele realiza ezame nasionál ba estudante finalista sira,” Beatriz de Deus dehan.
Nia afirma katak, estudante finalista sira iha Munisípiu Aileu prepara an ona atu tuir ezame, no espera katak prosesu ezame bele lao ho di’ak.
Tuir Beatriz, númeru ezame ne’ebé distribui ba direítór eskola sira sei uza atu organiza estudante sira tuir sala ezame ida-idak, inklui preparasaun meza iha sala aula.
“Prepara númeru ezame ba estudante sira no tau iha meza iha sala aula, atu kada sala bele simu estudante sira tuir organizasaun ne’ebé halo ona,” nia hatutan.
Iha fatin seluk, Diretór Eskola Sekundária Jerál 10 Dezembru Comoro, Manuel Verdial, hatete katak eskola simu ona númeru estudante finalista sira nian husi Servisu Edukasaun Munisípiu Dili, atu kompleta preparasaun administrativu ba ezame nasionál no ezame lokál.
“Númeru finalista sira nian ohin mak ami foin foti iha Edukasaun Munisípiu Dili, tuir dadus ne’ebé ami hatama ona antes,” Manuel Verdial dehan.
Nia esplika katak, númeru ezame ne’e sai hanesan identifikasaun ba estudante sira ne’ebé sei tuir ezame nasionál no ezame lokál.
Manuel hatutan katak, eskola prepara ona sala hamutuk 24 atu simu estudante sira durante ezame rua ne’e.
Nia husu estudante sira atu aproveita tempu ne’ebé iha hodi estuda no prepara an antes tama ba sala ezame.
“Ami husu estudante sira atu prepara an no estuda didi’ak, tanba loron ba ezame nasionál no ezame lokál besik ona,” nia afirma.
Estudante Delfina Magno mós hatete katak nia kontinua prepara an liuhosi estudu, tanba loron ezame besik ona.
“Ita rasik mak presiza prepara an, tanba loron ba ezame nasionál no ezame lokál konta de’it ona. Atu hetan rezultadu di’ak, ita tenke estuda,” Delfina Magno dehan.
(jac)
