DILI, STLTIMORLESTE.com – Servisu Edukasaun Munisípiu (SEM) Manatuto nafatin halo liña koordenasaun servisu ho parte eskola sira, inklui ho instituisaun relevante sira seluk, atu fasilita komunikasaun no rezolve dezafiu sira ne’ebé hasoru iha área edukasaun.
Diretor Servisu Edukasaun Munisípiu Manatuto, Luis Antonio Soares, hato’o informasaun ne’e ba STL liu husi telefone, Segunda (14/09/2026).
“Edukasaun Manatuto ita nafatin halo liña koordenasaun servisu ho ita-nia parte eskola sira. Nune’e mos, ita koordena servisu ho ita-nia instituisaun relevante sira seluk, tanba liña koordenasaun servisu ne’e importante tebes. Iha difikuldade ruma, ita presiza informa ba malu, ho nune’e ita bele relata fali ba ita-nia ministériu,” nia afirma.
Tuir Luis, bainhira eskola sira hasoru dezafiu ka problema ruma, presiza hato’o informasaun ba Servisu Edukasaun Munisípiu, atu bele halo pedidu ba Ministériu Edukasaun no buka resposta ba problema hirak ne’e.
“Nee duni, ami-nia liña koordenasaun servisu ho ita-nia eskola sira lao diak hanesan bai-bain. Ita-nia koordenasaun servisu ne’e mos importante tebes, atu ita nafatin informa ba malu,” nia dehan.
Iha fatin seluk, Diretor Servisu Edukasaun Munisípiu Ainaro, Patricio da Costa Magno, dehan Servisu Edukasaun Munisípiu Ainaro nafatin halo koordenasaun servisu ho lideransa eskola, inklui diretor sira, tanba koordenasaun ne’e importante tebes.
“Nudar Diretor Edukasaun Munisípiu Ainaro, ita nafatin halo koordenasaun servisu ho ita-nia lideransa husi eskola sira ne’ebé lokaliza iha Munisípiu Ainaro nia laran. Tanba liña koordenasaun ne’e importante tebes. Iha asuntu importante ruma, presiza fó informasaun ba malu. Difikuldade saida deit mak eskola sira hasoru, tenke fó informasaun. Tanba ne’e, iha koordenasaun ne’ebé diak ho ita-nia diretor eskola sira,” dehan nia.
Nia akresenta katak, bainhira eskola sira menus fasilidade ruma ka hasoru asuntu importante ruma, presiza relata ba Servisu Edukasaun Munisípiu, atu nune’e bele hato’o ba Ministériu Edukasaun.
“Ita hotu hatene katak eskola sira iha munisípiu balun iha área remotas. Nee duni, ita tenke kordena nafatin ho sira, ho nune’e bainhira iha asuntu importante ruma, ita fó hatene ba malu. Nee diak liu tan,” nia komenta.
Nia dehan, eskola sira iha Munisípiu Ainaro balun dook malu, liu-liu eskola sira ne’ebé lokaliza iha área remotas. Eskola balun besik malu, maibé iha mos eskola sira ne’ebé distánsia dook.
Entretantu, Diretor Servisu Edukasaun Munisípiu Lautem, Anibal Fernandes, hatete katak liña koordenasaun ho diretor eskola sira lao diak, tanba sira sempre halo kontaktu liu husi grupu edukasaun.
“Ita sempre halo kontaktu iha grupu edukasaun nian. Dala ruma mos, ita liu husi enkontru sira ne’e fó informasaun importante, liu-liu liga ba servisu. Nee tenke fó hatene ba malu, ho nune’e bele relata ba nível nasional,” nia hatete.
(jac)
