BAUCAU, STLTIMORLESTE.com – Reprezentante estudante Primeiru Siklu Segundu Anu iha Eskola Ensinu Baziku Filial (EBF) Uaitame, Munisípiu Baucau, Marisa dos Santos Ximenes, informa semana rua ho balu ona, estudante sira la hetan aula tanba professora ne’ebé responsavel ba turma abandona eskola.
Estudante Primeiru Siklu Segundu Anu iha EBF Uaitame ne’ebé afetadu hamutuk na’in 21, kompostu husi estudante feto no mane.
“Profesór la tama, ami halimar deit. Intervalo ona ami han, tur iha eskola, jam 12 ami ba fali uma. Ami sente triste tanba la hetan matéria aprendizajen. Ami husu haruka fila profesór mai,” hateten Marisa dos Santos Ximenes ba jornalista sira iha EBF Uaitame, Tersa (15/09/2026).
Marisa dehan, situasaun ne’e halo estudante sira la hetan matéria aprendizajen hanesan normal, mezmu kada loron tempu eskola estudante sira kontinua prezensa iha edifisiu eskola.
Profesora ne’ebé responsavel ba estudante sira ne’e nu’udar profesór bolsa kandidata ne’ebé Ministériu Edukasaun koloka ba eskola refere iha inísiu tinan 2026.
Maibé, profesora refere lakon prezensa iha eskola liu ona semana rua tanba, tuir informasaun estudante sira, hetan karta transferénsia husi Servisu Munisípal Edukasaun Baucau no Diretór Eskola Ensinu Baziku Sentrál (EBC) Afaça.
Nune’e estudante sira husu Autoridade Edukasaun atu foti desizaun lalais, hodi garante aula no matéria aprendizajen tuir direitu edukasaun.
Liga asuntu ne’e, STL tenta konfirma Diretór Servisu Munisípal Edukasaun Baucau no Koordenador EBF Uaitame, maibé laiha fatin atu fó komentáriu.
(tom)
