DÍLI, STLTIMORLESTE.com — Autoridade Munisípiu Dili (AMD) planeia taka Semitériu Bekusi iha Novembru 2026, tanba espasu hakoi mate-isin nakonu ona, maibé sidadaun husu solusaun alternativa molok desizaun ne’e aplika.
AMD planeia taka semitériu ne’e tanba kapasidade rai nian besik to’o limite.
Situasaun ne’e hamosu preokupasaun kona-ba fatin ne’ebé família sira bele uza bainhira presiza hakoi mate-isin.
Sidadaun Janúario da Silva komprende katak espasu iha Bekusi nakonu ona, maibé nia husu AMD atu prepara alternativa antes taka semitériu ne’e.
“Ami komprende katak espasu nakonu ona, maibé AMD tenke hatudu fatin foun ka solusaun klaru ba povu. Hakoi mate-isin mak nesesidade urjente no sensivel ba família sira,” dehan Janúario ba STL, iha Taibesi, Kuarta (28/10/2026).
Nia husu AMD atu fó informasaun klaru kona-ba lokalizasaun semitériu foun ka medida alternativa, atu família sira la hasoru difikuldade bainhira presiza hakoi sira-nia família.
Iha parte ketak Akademista Universidade da Paz (UNPAZ), Manuel Soares, konsidera situasaun ne’e hanesan sinal problema planeamentu urbanu no jestaun rai iha Dili. Tuir nia, kestaun semitériu presiza sai prioridade ba governu munisipál.
Manuel hateten katak aumentu populasaun presiza planeamentu ba tempu naruk. Governu labele hein to’o semitériu nakonu mak foin buka solusaun, maibé tenke identifika fatin foun antes situasaun sai urjente.
“Kestaun hakoi mate-isin presiza planu estratéjiku. Dili nia populasaun aumenta beibeik, entaun governu labele hein to’o espasu nakonu loos mak foin buka solusaun,” dehan Manuel Soares.
Antes nee Prezidente AMD, Fransisco dos Santos, informa ba jornalista sira iha Matadouru, Dili, katak família sira bele konsidera Semitériu Metinaru hanesan alternativa, maski konstrusaun no fasilidade iha fatin ne’e seidauk kompletu.
“Ita hotu akompaña no haree katak Semitériu Bekusi besik nakonu ona. Ne’e signifika katak fatin atu hakoi mate-isin la to’o ona no tama ona iha faze finál. Tanba ne’e, parese iha fulan-Novembru nia laran ita sei taka semitériu ne’e, nune’e labele hakoi mate-isin tan iha-ne’ebá,” dehan Fransisco dos Santos.
(car)
