BAUKAU, STLTIMORLESTE.com – Durante trimensal dahuluk tinan nee, Sentru Saude Tirilolo, Munisipiu Baukau, hetan vizitante hamutuk nain 39.342, neebe halao tratamentu saude no detekta maioria sofre moras Infesaun Respiratoriu Aguda (ISPA).
Xefe Sentru Saude Tirilolo, Luisa da Costa Belo aprezenta, iha trismestral dahuluk tinan nee, simu vizitante neebe halao tratamentu saude liu husi konsulta iha Sentru Saude Tirilolo ho nia Postu Saude haat iha Baukau Vila hamutuk nain 39.342 kompostu mane nain 16.356 no feto nain 22.986.
“Husi vizitante sira nee moras neebe maioria moras neebe aas liu mak, hanesan moras ISPA hamutuk 3.559,” Xefe Sentru Saude Tirilolo, Luisa da Costa Belo informa ba STL iha nia knaar fatin Tirilolo Baukau, Kuarta (15/04/2026).
Nia relata, aliende husi ISPA rejistu mos moras ema nain 330 infrenta moras hipertensaun, nain 237 infrenta moras diarea aguda, nain 237 infrenta pneumonia 237 no nain 21 infrenta moras dengue nomos inklui seluk tan.
Nia aprezenta, husi tipu moras refere hanesan dengue afeta liu ba labarik idade husi 01-14, ISPA no diarea afeta liu ba labarik afeta liu ba labarik idade menus husi 05, enkuantu tipu moran hanesan pneumonia no hipertensaun afeta liu ba ema idade 60 ba leten.
“Durante moras ISPA no hipertensaun too grave ilha ami nia fasilidade laiha, maibe dengue ami refere ba HoREX hamutuk nain 6,” Luisa akresenta.
Xefe Sentru Saude Tirilolo nee esplika, tipu moras hanesan ISPA nia kauza husi tempu udan neebe provoka sidadaun sira imunidade tuun neebe afeta mos husi konsumu la dun diak, hipertensaun tanba fator idade, han hemu neebe la kontrola no falta ezersisiu.
Nunee durante vizitante refere halao tratamentu saude pesoal saude sira iha Sentru Saude Tirilolo inklui iha Postu Saude haat sempre fo hanoin sira atu kontrola aan liu liu ba sistema han hemu, neebe tenke seguru no saudavel atu nunee sira livre husi moras.
Entretantu Sentru Saude Tirilolo ho nia Postu Saude haat nia area kobertura too iha Suku Seiçal, Buruma, Kaibada Makasae, Bahu, Kaibada inklui Suku Tirilolo rasik.
(tom)
