DILI, STLTIMORLESTE.com – Jurista Timor oan konsidera katak, setor justisa iha mudansa ona, iha aspetu numeru rekursu umanus.
“Depois Timor ukun aan, setor justisa iha mudansa liu-liu haree husi aspetu rekursu humanu kualifikadu nia numeru aumenta tantu Majistradu Judisial, Ministeriu Publiku, Defensor Publiku no Advogadu,” dehan Jurista Sergio Dias Quintas ba STL iha Kaikoli, Kuarta (13/05/2026).
Tuir nia, haree husi aspetu infraestrutura guvernu komesa instala sede Tribunal iha munisipiu balu, nomos loke ona sede delegasaun Ministeriu Publiku iha fatin balu, nee hatudu sinal pozitivu, tanba refleta ba sentidu ida katak, lori justisa hakbesik ba povu liu liu ba sira neebe kbiit laek.
Sergio afirma, politika Estadu nee diak, maibe mai ho nia dezafiu, presiza hadia mak tenki haree mos bem estar Juiz sira, Ministeriu Publiku, Defensor Publiku no mos ofisial Justisa sira, ida nee importante, tanba bele asegura sira nia integridade, nomos presiza kria kondisaun ba formasaun komplentar ba sira.
Iha fatin ketak, Akademiku UNTL, Rafael de Jesus dehan, setor justisa presiza aumenta rekursu umanus, atu apoiu servisu Tribunal nian lao ba oin.
“Hau hanoin sektor justisa importante tebes, publiku balu sei kontinua halerik konaba kazu pendente, tanbe nee hanoin ba futuru kontinua aumenta numeru rekursu umanus,” dehan nia.
Afirma tan, sentru formasaun tenke iha planu neebe diak, atu kada tinan kontinua forma rekursu umanus sira, hodi bele investe ba iha setor justisa.
(ter)
