DILI, STLTIMORLESTE.com – Jurista Konsidera katak, importante duni estabelese Supremu Tribunal Justisa (STJ) hodi kompleta soberania Estadu.
“STJ nee importante hodi kompleta lo-loos soberania estadu nian funsionamentu, STJ nia atu tesi lia kona-ba direitu sivil, direitu penal no kestaun eleitoral,” dehan Jurista Sergio Dias Quintas ba STL iha Kaikoli, Sesta, (05/06/2026).
Tuir Sergio, neste momentu Estadu liu husi Prezidente Republika prepara ona sede provizoriu STJ nian. Tanba nee, se mak bele sai Juiz iha STJ nee depende ona husi komisaun rekrutamentu, liu husi selesaun mak bele hatene priense kriteriu ka lae?, wainhira sira pasa iha ezame, sira nee mak sei sai Juiz konselheiru hodi tur iha STJ.
Mia sublina, nia parte ladun aseita wainhira komisaun fo prioridade ba Juiz sira hotu neebe servisu tinan 10 ona sira bele konkore, maibe komisaun haluha tiha ona katak ba kareira nee importante tebes.
Tuir lo-loos haree husi Juiz sira nia kareira diak mak bele fo prioridade para sira nee mak konkore, nee norma konstituisaun RDTL mos koalia ida nee.
Hanesan Jurista, la konkorda Juiz servisu tinan 10 konkore hotu, tanba konsidera viola norma konstituisaun RDTL no estatutu mazistradu judisial. No tuir lo-loos Juiz sira neebe iha kareira elevada ka aas liu mak bele promove hodi tur iha STJ, tanba sira nee mak iha ona meritu no iha kapasidade intelektual, no liu ona husi prosesu inspesaun.
Iha sorin seluk, Akademiku UNTL, Rafael de Jesus dehan, komisaun tenke haree didiak hodi nomeia Juiz neebe iha kapasidade diak atu ba tur iha STJ.
“Hau hanoin komisaun iha knaar importante tebes atu avalia no haree didiak hodi hili Juiz neebe sei tur iha STJ, tenke Juiz neebe iha kapasidade diak atu haree ba setor justisa iha Timor,” dehan nia.
Nia hatutan, STJ kuandu ida ona nia mak sai hanesan Tribunal neebe aas liu no desizaun neebe nia deside hanesan ona desizaun ikus. Tanba nee tenke nomeia Juiz no Jurista neebe iha kapasidade atu halao knaar iha STJ.
Aleinde nee, Prezidente Tribunal Rekursu, Afonso Carmona dehan, Juiz sira neebe sei ba tur iha STJ, ida nee kabe ba iha komisaun nia servisu. Kuandu Komisaun nia servisu hotu ona mak foin hatene lo-loos nia rezultadu. Tanba nee tau konfiansa ba iha Komisaun hodi halao sira nia servisu.
(ter)
