DILI, STLTIMORLESTE.com – Sidadaun Australia ida ho idade 55 mate iha Komponente Terrestre FALINTIL- Forsa Defeza Timor Leste (F-FDTL) Baukau, agora daudaun mate isin tau ona iha sala Mortoariu Hospital Nasional Guido Valadares (HNGV), hodi prosesu ba Autopsia.
Xefe Estadu Maior Jenerál F-FDTL, Tenente Jenerál, Domingos Raul “Falur Rate Laek” dehan, kuandu mate, dadersan F-FDTL simu kedas informasuan katak, sidadaun Australia ida mate iha nia toba fatin, sira hatene tanba dader Kuliner tama ba nia fatin hodi hamoos fatin mak hetan sidadaun nee latan hela iha nia toba fatin ho kondisaun mate.
“Ita fo orientasaun ba membru F-FDTL sira lori kedas ba iha Sala Mortoariu HNGV, depois ita koopera hamutuk ho Austrália Sira para Autópsia, para hatene nia kauza nee saida,” hatene Tenente Jenerál, Domingos Raul “Falur Rate Laek” ba jornalista sira iha Kuartel Jeral, F-FDTL Fatuhada, Dili, Kurta (11/12/2024).
Nia dehan, sidadaun Australia iha Komponente Terrestre F-FDTL neeba nia knaar nuudar formador ba membru F-FDTL sira kona-ba língua ingles nian.
“Ita Haree derrepente mate iha kuartu neeba ita la hatene nia moras saida, maibe nia isin metan hotu nee ita la hatene moras saida, maibe mediku sira haree no hatete mai dehan nia problema atakasaun fuan,” nia esplika.
Iha fatin ketak, Mediku Kardiologista Hospital Referal Baukau, Domingos da Costa informa, sidadaun Australia nee mate 24 oras ona no haree deit fator risku neebe mak iha sidadaun nee bokur, fuma, tanba nee bele atakasaun fuan nee mak nia derrepente mate.
“Ita haree nia fator risku nee isin boot, depois fuma no dala ruma nia struk kiik depois atakasaun fuan nee mak nia mate derrepente nee, maibe ita hein prosesu investigasaun no Autópsia mak ita foin hatete lo-loos kauza husi mate nee ,” nia informa.
(jen)
