BAUCAU, STLTIMORLESTE.com – Sidadaun Silvano Gomes, idade 30, neebe hetan tiru iha Suku Irabin de Baixo, Postu Administrativu Uatucarbau, Munisipiu Viqueque, hakotu ona iis iha Hospital Nasional Guido Valadares (HNGV) Dili.
Vitima refere orijen husi Aldeia Beturia, Suku Irabin de Baixo, neebe iha loron 15 Agostu nee pur-volta tuku 08:00 dader ho motor KLX mak hetan insidente “tiru” husi membru Polisia tranzitu, iha area besik eskola EBC 13, Aldeia Taraday, Suku Irabin de Baixo, tanba deskonfia vitima ho motor la uza kapasete.
Hafoin vitima hetan insidente refere, transporta kedas ba Hospital Munisipal Viqueque, maibe kontinua kedas transfere ba HNGV Dili hodi kontinua halao tratamentu, tanba razaun kondisaun grave.
Nunee durante tratamentu iha HNGV Dili halao operasaun sira, iha neebe tuir vitima nia Maun, Reinaldo Basílio husi Hospital Nasional Guido Valadares (HNGV) Dili ba STL liu husi telefone, Domingo 16 Agostu 2026, hatete, vitima rasik halo ona interasaun ho parte familia neebe hein vitima iha prosesu tratamentu saude. Maibe iha loron 17 Agostu 2026, parte dader, vitima hakotu ona iis.
“Sim vitima hakotu ona iis,” hateten badak husi vitima nia Maun, Reinaldo Basílio husi Hospital Nasional Guido Valadares (HNGV) Dili ba STL liu husi telefone, Segunda (17/08/2026)
Nia sublina, parte familia kontinua hein prosesu no kopera ho justisa neebe iha, sei sumbete vitima nia mate isin ba prosesu autopsia.
(tom)
