DILI, STLTIMORLESTE.com – Sistema produsaun pasaporte avaria hodi halo atendimentu la lao, nunee Ministru Justisa fo ona orientasaun ba iha parte sira, atu oinsa buka solusaun ba kestaun ida nee.
“Hau fo ona orientasaun ba iha Servisu Rejistu Notariadu liu-liu ba iha Diretor Pasaporte nian atu bele urjentemente haree situasaun sira nee, ”dehan Ministru Justisa, Sergio Hornai ba jornalista sira iha Kaikoli, Dili, Kuarta (18/12/2024).
Nia hatutan, iha hela teknolojia dizitalizasaun ba iha sistema neebe opta, dala ruma iha espetativa boot dehan katak tenke lao normal, maibe dala ruma iha problema tekniku balu, se iha enerjia ruma monu bele fo implikasaun ba sistema nee rasik.
Tenke iha sistema ida prezervadu ho didiak, no indentifika tiha ona ekipamentu balu neebe iha ligasaun ba iha intorupsaun loron hirak nee, liu-liu iha ekipamentus ida naran Sisko neebe foti hela rezerva mai husi Aileu atu substitui fali ida iha Dili ninian atu bele halo konfigurasaun fila fali ho normaliza fila fali sistema nee.
No nia fo ona orientasaun iha loron Tersa nee too kalan halo mos kontaktu balu ho kompanhia fornesedor sistema, neebe nia sede iha Singapura liu husi Thales hanesan kompanhia neebe presta servisu ba iha emisaun pasaporte no sistema sira ba iha sistema digitalizasaun pasaporte nian.
Iha fatin ketak, Akademiku UNTL, Rafael de Jesus dehan, ohin loron ema barak mak halo viajen ba rai liur hodi buka moris, presiza iha pasaporte mak sira foin bele lao, tanba nee Governu tenke buka solusaun ho lais ba kestaun nee.
(ter)
