Sosializasaun Ba Populasaun, Labele Halo Uma Iha Area Protejidu

Mota Komoro (Foto: Espesial)

DILI, STLTIMORLESTE.com – Governu presiza halo sosializasaun no edukasaun sivika ba sosiedade, nunee labele halo uma iha area protejidu nomos area risku ba dezastre naturais.

Tuir Diretor AJAR, José Luis de Oliveira ba jornalista sira iha nia knaar fatin Farol, Kuarta (15/01/2025).

Nia hatete, presiza halo sosializasaun no edukasaun sivika ba sidadaun sira, hodi labele halo uma iha area protejidu nomos area risku ba dezastre naturais, se taka deit avizu nee mos la rezolve problema.

“Ema balu eskola maibe la komprende saida mak nia aprende, ida nee mos iha, tanba ita nia eskola lee hatene, maibe la komprende saida mak hakerek nee, tanba nee mak ba tau avizu iha neeba mos ema la komprende. Buat neebé presiza mak edukasaun, sosializasaun ho maneira ida neebe tuir populasaun nia edukasaun para halo ema komprende,” katak nia.

Nia haktuir tan, presiza halo sosializasaun tuir nivel sosiedade, nunee bele komprende tanba tau deit avizu nee buat benda mati ida, tanba iha Timor asesor no Diretor barak diak liu tun ba halo edukasaun ho komunidade.

Nia hatete, ema neebe halo Hotel California nee kala eskola mak la komprende ida nee. Ezemplu ida avizu taka tiha mais ema la halo sosializasaun, no edukasaun sivika no kontrola ida nee mos susar.

Nunee mos avizu tau iha Tasi Tolu, tanba area protejidu maibe la ba halo kontrolu iha neeba, entaun povu la hatene ba halo uma.

Nunee mos Visi Diretor HAK, Antonino de Limas hatete, lei proteje ba area protejidu no Ministeriu neebe tutela presiza halo avizu no kontrola beibeik no presiza mos halo sosializasaun.

“Ministeriu kompetente tenke halo servisu ida nee, liu husi avizu no sosializasaun, tanba ita nia komunidade balu la hatene duni area protejidu ka lae, sira la interese, tanba nee presiza tau avizu nee ba sira neebe lee hatene,” katak nia.

Nia hatutan, labele hanoin tau ona avizu nee rezolve ona problema, maibe nafatin halo sosializasaun ba suku sira no ba area neebe protejidu, esplika lei neebe iha ba komunidade sira, nunee komunidade bele hatene area protejidu no risku.

(eme)

Share it :

Leave a Reply

Your email address will not be published. Required fields are marked *