DILI, STLTIMORLESTE.com – Diretora Ezekutiva PCD iha Hospital Nasional Guido Valadares (HNGV), Cecilia Barros Mendonça hatete, daudaun nee iha Hospital HNGV stock aimoruk sufisiente ba pasiente sira.
“Ita nia stock aimoruk iha HNGV daudaun nee 11%, konsumaveis 13%, signfika ita nia aimoruk iha Hospital Nasional sufisiente, tanba nee husu ba publiku katak, preokupasaun ba aimoruk nee garantidu no sufisiente ba ita hotu,” dehan Cecilia ba jornalista sira iha HNGV, Dili, Segunda (16/12/2024).
Nia dehan, kondisaun sira seluk neebe sai preokupasaun ba publiku, dehan HNGV laiha makina CT Scan, laiha aimoruk Dobutamine nee lalos, tanba daudaun nee iha aimoruk neebe sufisiente ba pasiente sira.
Tanba nee husu ba publiku katak, MS nia kapasidade ba dezenvolvimentu saude publiku iha Timor Leste (TL) nee sufisiente, no makina balu neebe ladun iha kondisaun diak, Governu liu husi MS tau iha prosesu, nee sei buka alternativu atu funsiona fila-fali hodi halo diagnostiku neebe adekuadu.
Iha sorin seluk, Estudante Universidade Nasional Timor Lorosa’e (UNTL), Area Parteira, Joãna Cabral dehan, kondisaun sira iha mundu presiza aimoruk, ho objetivu atu halo kurativu ba kondisaun neebe sente todan, moras sira, nunee bele sente fila fali seguru no konfortavel.
Tanba nee stock aimoruk neebe iha HNGV kuandu la sufisiente ona presiza buka meius oinsa atu sosa fila fali, nunee aimoruk tenke iha nafatin ba pasiente tomak.
No moras hotu-hotu presiza aimoruk, tenke tau aimoruk neebe iha kualidade diak ba ema hotu nia saude, no makina balun neebe kondisaun ladun diak ona presiza tau makina neebe iha kualidade diak, tanba MS nee sai fatin ba ema hotu atu asegura moris laos mate.
Aleinde nee, Prezidente Parlamentu Nasional (PPN), Maria Fernanda Lay husu Ministeru Saude (MS) atu kontinua rezolve problema aimoruk no fasilidade saude sira iha teritoriu nasional.
Tanba preokupa ba stock aimoruk no fasilidade saude iha teritoriu nasional, maibe se mak halo papel, nee Ministeriu Saude, nunee husu atu kontinua halo dezenvolve no rezolve ba preokupasaun publiku nian ba dezenvolvimentu saude iha Timor Leste.
(EST 1)
